La APUC Grischun ha l'incumbensa da proteger cun mesiras adequatas persunas cun in basegn da protecziun e d'assistenza sco er d'organisar agid per questas persunas en il sectur persunal e finanzial/administrativ u en la correspundenza giuridica, sche la famiglia u purschidas da sustegn voluntaras na pon betg prestar quest agid en moda suffizienta.

Il basegn individual da protecziun e d'assistenza vegn gulivà tras «mesiras sin mesira» (curatellas) e vegn sche pussaivel eliminà, uschia che la situaziun da la persuna pertutgada po vegnir stabilisada u meglierada. Il dretg d'autodeterminaziun ha ina impurtanza speziala en il rom da las pussaivladads (mesiras facultativas dals geniturs, mandats preventivs, disposiziuns da pazients, dretgs da represchentanza tenor la lescha, commensurabladad da las mesiras e.u.v.).

Plinavant attribuescha il Cudesch civil svizzer (CCS) ulteriuras incumbensas a la APUC. Independentamain d'ina mesira garanteschan quellas la gulivaziun da deblezzas u la defensiun dals interess. I sa tracta d'approvar contracts da mantegniment e d'assistenza per uffants da geniturs betg maridads, decider davart l'adopziun, validar mandats preventivs, intervegnir sin dumonda en cas che disposiziuns da pazients na vegnan betg observadas, tractar recurs cunter mesiras che restrenschan la libertad da sa mover e.u.v.

Per la procedura davant la APUC vegnan mess a quint custs. En cas da circumstanzas spezialas poi vegnir desistì d'incassar custs da procedura, nun che la procedura saja vegnida introducida da levsenn u en moda targlinanta.