Constataziun da la paternitad e regulaziun dal mantegniment

Sch'ils geniturs dovran agid per constatar la paternitad e per reglar il mantegniment, survegnan els quel da la APUC. Sche l'uffant na vegn betg renconuschì dal bab entaifer il termin fixà, sch'i na vegn betg fixada ina regulaziun da mantegniment resp. sch'i na vegn betg preschentada ina decleraziun concernent la tgira genituriala cuminaivla, po l'autoritad constituir ina curatella per l'uffant. Questa curatella sto defender ils interess da l'uffant envers il bab ed en cas da basegn purtar in plant sin paternitad resp. sin mantegniment tar la dretgira responsabla.

Avugadia

In'avugadia vegn constituida mo en cas excepziunals, sch'ils geniturs n'èn betg en il cas d'exequir lur tgira genituriala confurm a l'obligaziun pervia da mancanza d'experientscha, pervia da malsogna, pervia da mendas, pervia d'absenza, pervia da violenza u pervia da motivs sumegliants (p.ex. sche la mamma è anc minorenna u sch'ils titulars dal dretg da tgira èn morts).

Regulaziun dal contact persunal (dretg da visita)

Sch'ils geniturs na vivan betg ensemen, han l'uffant ed il genitur senza dretg da tgira vicendaivlamain in dretg d'in contact persunal commensurà. Da princip organisescha la famiglia sezza il contact. Ma sch'ella na po betg far ina cunvegna consensuala che correspunda al bainstar da l'uffant, regla – sin dumonda – la APUC il contact persunal.

Regulaziun da la tgira genituriala

Dapi il 1. da fanadur 2014 pon geniturs che n'èn betg maridads in cun l'auter e che vulan exequir cuminaivlamain il dretg da tgira, far ina decleraziun correspundenta tar l'autoritad responsabla (cun la renconuschientscha da paternitad tar l'uffizi da stadi civil, pli tard tar la APUC). Sch'in genitur refusa da far la decleraziun, po l'auter genitur sa drizzar a la APUC. La APUC conceda la tgira genituriala cuminaivla, sch'i na resulta betg ina periclitaziun dal bainstar da l'uffant tras quai. 

Dapi il 1. da schaner 2015 ha la APUC l'incumbensa da decider – en connex cun la tgira genituriala cuminaivla da geniturs betg maridads – en cas da basegn davart l'attribuziun da bunificaziuns d'educaziun. Detagls en chaussa chattais Vus sin il "Fegl d'infurmaziun davart bunificaziuns d'educaziun da la AVS".