La consegna da scrittiras giuridicas, dumondas ed autras communicaziuns tras e-mail ordinaris, fax ed auters meds sumegliants na è betg permissiva. Cun quests meds da communicaziun na pon ins betg effectuar acts processuals valaivels. Er la consegna tras portatuns electronics (CD-/DVD-ROM, stick USB etc.) na vegn per motivs da segirezza betg acceptada.

Communicaziun electronica - Consegna tras e-mail segir

Las partidas pon er inoltrar lur scrittiras en furma electronica (art. 110 al. 2 CPP). En quest connex sto vegnir observà che la consegna valaivla na po betg vegnir fatga tras in e-mail ordinari. Perquai sto vegnir tschernì in canal d’access spezial, numnadamain ina plattafurma renconuschida per la spediziun segira. Ultra da quai ston las scrittiras esser munidas cun ina suttascripziun electronica renconuschida e qualifitgada. La procura publica è registrada tar IncaMail.

Valan las suandantas directivas:

1. Las scrittiras ston vegnir inoltradas en il format PDF, esser designadas cleramain e numeradas, sche necessari.
2. Las scrittiras ston vegnir suttascrittas electronicamain cun in certificat qualifitgà.
3. Ils documents PDF ston vegnir tramess entaifer il termin tras la plattafurma da spediziun a l’adressa uffiziala da la procura publica cun il gener da spediziun «Recumandà».

Spediziun electronica da la procura publica a las partidas

La procura publica n’è il mument betg obligada da respunder electronicamain. Uschè ditg che la legislaziun u la giurisprudenza na prevesan nagut auter, cumpiglia la communicaziun electronica en il chantun Grischun il mument be la retschavida da scrittiras, però betg la spediziun da decisiuns, disposiziuns processualas, citaziuns etc. tras dretgs e autoritads.