Persunalias, midada da domicil, exteriur

Jau hai midà chasa ni mes num. Stoss jau annunziar quai a l'uffizi per il traffic sin via?

Sco possessura u possessur d'in permiss da manischar u dal document d'in vehichel avais Vus – tenor lescha – l'obligaziun d'ans annunziar entaifer 14 dis eventualas midadas da las datas en il permiss u en il document.

Tge stoss jau far, sche jau abitava a l'exteriur e sun vegnì a star en il chantun Grischun?

En general dastga in permiss da manischar valaivel, emess d'in stadi ester, vegnir duvrà en Svizra durant maximalmain 12 mais. Quai na vala dentant betg per viadis per motivs professiunals.

Las suandantas persunas dovran in permiss da manischar svizzer:

• amanischunzas e manischunzs da l'exteriur che abitan dapi 12 mais en Svizra, senza esser sa trategnids durant quest temp dapli che 3 mais nuninterruttamain a l'exteriur;
• persunas che mainan professiunalmain vehichels a motor da las categorias C, C1, D u D1 immatriculads en Svizra u che dovran ina permissiun per il transport professiunal da persunas. En quest cas sto il permiss svizzer vegnir acquistà avant che cumenzar l'emprim viadi professiunal.

Jau vegn en Svizra cun mes vehichel ch'è immatriculà a l'exteriur. Quant ditg dastg jau anc duvrar qua l'auto cun ils numers esters e co poss jau immatricular il vehichel en Svizra?

 Il vehichel sto vegnir immatriculà en Svizra, sch'el è staziunà qua dapi almain 1 onn. Sch'el vegn puspè manà a l'exteriur e resta là durant almain 3 mais consecutivs, cumenza la calculaziun dal staziunament da nov, cur ch'il vehichel vegn puspè manà en Svizra.

Sche Vus avais annunzià Voss vehichel a l'uffizi svizzer da duana, cur che Vus essas entrada u entrà en Svizra, ans communitgescha quest uffizi che Vus hajas importà il vehichel (permissiun da la duana, formular 15.30). Suenter As infurmain nus en scrit, entaifer tge termins che Vus stuais immatricular il vehichel en Svizra.

Jau hai cumprà in auto a l'exteriur e vuless l'immatricular en il chantun Grischun. Tge stoss jau far

Quai stuais Vus far stim

Permiss per emprender a manischar

Co survegn jau in permiss per emprender a manischar?

Sche Vus vulais survegnir per l'emprima giada in permiss per emprender a manischar per ina tscherta categoria, stuais Vus As preschentar persunalmain tar la controlla d'abitantas e d'abitants / administraziun communala da la vischnanca da domicil u tar l'uffizi per il traffic sin via, nua che Vus suttamettais il formular da dumonda emplenì e suttascrit e mussais in document d'identitad valaivel cun fotografia (carta d'identitad u passaport). La controlla d'abitantas e d'abitants / administraziun communala (u l'uffizi per il traffic sin via) examinescha Vossa identitad e conferma quella cun in bul e cun ina suttascripziun. Alura trametta ella il formular da dumonda cun ils documents appartegnents a noss uffizi.

Permiss da manischar

Droval jau a l'exteriur in permiss da manischar internaziunal?

Tgi che giavischa in permiss da manischar internaziunal, sto posseder in permiss da manischar svizzer valaivel.

Il permiss da manischar internaziunal serva mo sco translaziun dal permiss naziunal ed è valaivel mo ensemen cun quel. Permiss da manischar internaziunals che vegnan emess sin basa da permiss da manischar svizzers n'èn perquai betg valaivels en Svizra.

Avant che cumenzar Voss viadi a l'exteriur As recumandain nus d'As infurmar (tar in biro da viadi, tar in consulat, tar ils posts d'admissiun a l'exteriur e.u.v.), sch'i dovra in permiss da manischar internaziunal en il stadi respectiv.

Co empostel jau in duplicat dal permiss da manischar suenter perdita ni enguladitsch?

Per quest intent As supplitgain nus d'ans inoltrar ils suandants documents:

en mintga cas il formular "Annunzia da permiss e da documents pers" (che po vegnir emplenì al computer)

sch'il permiss da manischar blau è ì a perder, stuais Vus er inoltrar il formular "Dumonda da remplazzar il permiss da manischar blau tras in permiss da manischar en il format da carta da credit" ed ultra da quai ina fotografia da passaport

per il permiss per emprender a manischar duvrain nus adina er ina nova fotografia da passaport.

Co remplaz jau mes permiss da manischar blau tras in permiss da manischar en il format da carta da credit (PCC)?

Sche Vus vulais laschar remplazzar Voss permiss da manischar blau tras in PCC, pudais Vus retrair il formular da dumonda correspundent tar Vossa controlla d'abitantas e d'abitants / administraziun communala u tar l'uffizi per il traffic sin via. Vus pudais er chargiar giu il formular sco PDF e l'emplenir al computer (duvrai per plaschair mo palpiri alv per stampar).

Il formular sto vegnir suttascrit cun colur naira, ed en il lieu previs sto vegnir tatgada ina fotografia da passaport da colur. Ensemen cun il permiss da manischar blau sto il formular vegnir tramess a noss uffizi (en cas da midadas dal num e/u dal lieu d'origin per plaschair er agiuntar ina copia da la carta d'identitad).

Tge stoss jau far, per midar miu permiss da manischar da l'exteriur  en in permiss da manischar svizzer?

Sin dumonda en scrit u per telefon dain nus gugent da tut temp infurmaziuns detagliadas areguard l'utilisaziun da permiss da manischar da l'exteriur sin il territori svizzer.

En general dastga in permiss da manischar valaivel, emess d'in stadi ester, vegnir duvrà en Svizra durant maximalmain 12 mais. Quai na vala dentant betg per viadis per motivs professiunals.

Controlla medicinala da l'abilitad da manischar

Co sai jau prolungar il termin per la controlla medicinala?

La prolungaziun savais Vus dumandar si nus per telefon.

Examen da manischar

Cun tge vehichel stoss jau ma preschentar a l'examen da manischar?

Ils suandonts vehichels ein necessaris per las actualas categorias.

Quant ditg stoss jau spetgar a partir da l'annunzia fin al termin da l'examen pratic?

Suenter che la carta d'annunzia è entrada, vai normalmain 5 emnas fin al termin d'examen. En cas excepziunals ed en cas che la dumonda è gronda stuais Vus quintar da spetgar in pau pli ditg. L'examen pratic da manischar po vegnir fatg mo cun ina carta da clamada e cun in permiss valaivel per emprender a manischar.

Tge stoss jau far, sche jau stoss disdir a curta vista il termin da l'examen?

Fin 7 dis (5 dis da lavur) avant il termin pudais Vus As retrair gratuitamain l'examen. Sche Vus As retirais tard l'examen, As stuain nus displaschaivlamain metter a quint l'entir import d'examen.

Controlla dal vehichel

Cura stoss jau preschentar mes vehichel?

Il intervals da las controllas anflais Vus qua.

Tge midadas stoss jau laschar controllar uffizialmain?

Midadas vi da vehichels ston vegnir annunziadas a noss uffizi. Nus essan obligads da controllar vehichels midads avant ch'els vegnan puspè duvrads.

En spezial sto vegnir annunzià il suandant:

• midada da la classificaziun dal vehichel;
• midada da las dimensiuns, da la distanza axiala, da la distanza tranter las rodas, dals pais;
• intervenziuns che midan las emissiuns da svapur u da canera;
• indriz da sbuf che n'è betg approvà per il tip da vehichel;
• midada vi da la transmissiun;
• rodas che n'èn betg approvadas per il tip da vehichel;
• midada vi dal guvernagl u vi dals frains;
• montascha d'in indriz per trair chars annexs;
• tut las autras midadas essenzialas.

Co survegn jau in termin per ina controlla dal vehichel?

In termin savais Vus reservar online, per telefon, en scrit, persunalmain al spurtegl ni qua.

Tge preparaziuns stoss jau far, avant che preschentar mes vehichel?

Nus As supplitgain da controllar, da nettegiar e – sche necessari – da laschar reparar il vehichel avant la controlla. Reparaturas provisoricas na pudain nus betg renconuscher.

Ston autos da furniziun e chars annexs vegnir preschentads cun chargia?

Camiuns, autos da furniziun e chars annexs cun frain ston vegnir preschentads cun almain 75% dal pais total ch'è inscrit en il document dal vehichel.

Dastg jau preschentar mes vehichel l'enviern cun pneus da stad?

Sche l'aura permetta, dastgais Vus preschentar il vehichel durant l'enviern cun pneus da stad. En mintga cas stoi esser pussaivel da far in viadi d'emprova.

Numers d'immatriculaziun

Poss jau exprimer giavischs areguard l'attribuziun dals numers d'immatriculaziun

Nus ademplin gugent Voss giavischs areguard l'attribuziun d'in tschert numer d'immatriculaziun, sche Vus pajais la taxa supplementara respectiva. Da princip èn pussaivlas tut las cifras da 5 e da 6 posiziuns fin GR 999'998 (motos da GR 1'000 fin GR 99'999), sch'ellas èn libras (termin da furniziun per numers d'immatriculaziun betg anc fabritgads ca. 14 dis).

Betg consegnads na vegnan dentant:

• numers d'immatriculaziun da 4 posiziuns u damain (motos da 3 posiziuns u damain)*,
• numers d'immatriculaziun alvs per vehichels a motor cun unicamain las medemas cifras (p.ex. GR 99'999 u GR 999'999)*,
• numers d'immatriculaziun alvs per vehichels a motor cun cifras ch'èn in factur da 100'000 (p.ex. GR 100'000 u GR 300'000)*,
• numers d'immatriculaziun alvs per vehichels a motor cun cumbinaziuns da cifras che furneschan in maletg reflectà (p.ex. GR 100'001, GR 550'055 u GR 880'088)*, sco er
• numers d'immatriculaziun alvs per vehichels a motor da las serias GR 90'000 – GR 94'999, GR 120'000 – GR 150'000 e GR 200'000 – GR 200'100.
  

* Quests numers d'immatriculaziun vegnan mo vendids tras ingiant.

Vali la paina da deponer temporarmain mes numers d'immatriculaziun?

Vus pudais deponer da tut temp Voss numers d'immatriculaziun tar noss uffizi. Resguardai dentant per plaschair che er l'assicuranza vegn interrutta en cas d'in deposit.

Las taglias da traffic na ston betg pli vegnir pajadas a partir da l'emprim di suenter ch'ils numers èn vegnids deponids.

Tge stoss jau far per puspè metter en circulaziun mes vehichel e per retrair ils numers deponids?

Per puspè metter en circulaziun ils numers d'immatriculaziun duvrais Vus in attest d'assicuranza electronic (AAE); quel vegn tramess da la societad d'assicuranza sin via electronica directamain a l'uffizi per il traffic sin via. Ils numers As vegnan alura surdads u tramess per posta per il di, a partir dal qual l'attest d'assicuranza è valaivel.

Cur ch'ils numers vegnan mess en circulaziun, pajais Vus ina taxa da deposit ed a partir da quest di er puspè la taglia da traffic.

Quant ditg restan reservads per mai ils numers d'immatriculaziun che jau hai deponì?

Ils numers che Vus deponis restan reservads per Vus durant 1 onn.

Mes numers d'immatriculaziun n'èn betg pli uschè bels. Co survegn jau numers novs e quant custa quai?

Sin Voss giavisch e cunter in pajament pudain nus laschar fabritgar da nov Voss numers d'immatriculaziun. Empleni per quest intent il formular "Fabricaziun da novs numers d'immatriculaziun".

Ils numers novs pudais Vus alura retrair a noss spurtegls a Cuira u a Samedan u tar il post cumpetent da la polizia chantunala, e restituir ils numers vegls.

Resguardai per plaschair ch'il termin da furniziun importa ca. 14 dis.

Immatriculaziun dal vehichel

Tge actas dovr jau per survegnir in document dal vehichel e numers d'immatriculaziun?

Sche Vus vulessas immatricular in vehichel en il chantun Grischun, pudais Vus far quai per posta u a noss spurtegl. Per quest intent duvrain nus ils suandants documents:

• In attest d'assicuranza electronic che Vus survegnis da Vossa societad d'assicuranza. Sche Vus vulais immatricular dus vehichels per il medem numer d'immatriculaziun (numer transferibel), dovri dus attests d'assicuranza electronics. Sin l'attest d'assicuranza electronic sto la societad d'assicuranza avair marcà la rubrica correspundenta (WS per "Wechselschild").
• Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà da la garascha, cur che Vus cumprais il vehichel.
• En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.
• Sche Vus immatriculais per l'emprima giada in vehichel, stuais Vus er anc preschentar ina quittanza dals documents deponids da la controlla d'abitantas e d'abitants. Firmas ston preschentar in extract dal register da commerzi.

Pertge dovri in attest d'assicuranza?

In attest d'assicuranza elctronic è obligatoric per tut ils vehichels a motor sco er per tut ils chars annexs che servan al transport da persunas e da rauba privlusa. L'attest d'assicuranza electronic è il mussament che Vus sajas assicurà en la dimensiun necessaria tar ina societad d'assicuranza cunter las ristgas da responsabladad.

Co stoss jau proceder per midar vehichel?

Vulais Vus immatricular in auter vehichel empè da quel che Vus avais gì fin ussa? En quest cas duvrain nus ils suandants documents:

• In attest d'assicuranza electronic che Vus survegnis da Vossa societad d'assicuranza. Sche Vus vulais immatricular dus vehichels per il medem numer d'immatriculaziun (numer transferibel), dovri dus attests d'assicuranza electronics.
• Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà, cur che Vus cumprais il vehichel.
• En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.
• Il document dal vehichel immatriculà fin ussa per annullar quel (sche quai n'è betg gia vegnì fatg).

Co survegn jau numers d'immatriculaziun transferibels e quants vehichels poss jau immatricular sin il medem numer?

Sche Vus vulais metter en circulaziun in segund vehichel cun il numer da Voss vehichel gia immatriculà (numer transferibel), duvrain nus ils suandants documents:

• In attestd'assicuranza electronic che Vus survegnis da Vossa societad d'assicuranza.
•  Sch'il vehichel è resch nov, duvrain nus plinavant il formular "Rapport da controlla 13.20A". Quel vegn surdà da la garascha, cur che Vus cumprais il vehichel.
•  En cas d'in vehichel d'occasiun duvrain nus il document dal vehichel da la possessura veglia u dal possessur vegl. Sch'il vehichel è vegnì vendì "directamain suenter la controlla", duvrain nus plinavant il rapport da controlla correspundent.

 Numers transferibels pon da princip vegnir concedids mo a maximalmain dus vehichels. In'excepziun vala per vehichels veterans (oldtimers), vehichels da lavur e per chars annexs.

Il document da mes vehichel è ì a perder. Tge stoss jau far?

Avais Vus pers Voss document dal vehichel? Alura stuais Vus laschar emetter in duplicat correspundent.

Il formular correspundent ed ulteriuras infurmaziuns anflais Vus qua.

Tge dovr jau per exportar in vehichel?

Per transferir il vehichel duvrais Vus numers d'immatriculaziun per l'export sco er in document dal vehichel da durada limitada.

Il document dal vehichel vegn limità sin la fin dal mais d'immatriculaziun. Sch'il mais dura mo pli 4 dis chalendars u damain, po la possessura u il possessur dal vehichel dumandar in'extensiun da la limitaziun fin la fin dal mais suandant. La valaivladad na dastga dentant mai surpassar 35 dis chalendars.

Poss jau immatricular in vehichel mo per in pèr dis?

Sche Vus vulais metter en circulaziun in vehichel segir per intents privats mo per intgins dis, è il permiss dal di (u da plirs dis) la soluziun ideala per quest intent.

Quant ditg vala in numer dal di?

Permiss dal di vegnan emess per ina durada da 24, 48, 72 u 96 uras.

Poss jau far in viadi a l'exteriur cun in numer dal di?

Eventualas restricziuns per viadis a l'exteriur ston vegnir scleridas tar las autoritads estras cumpetentas.

Privaziun dal permiss da manischar

Poss jau divider la durada da la privaziun, p.ex. en cas d'ina privaziun da 2 mais cun dar giu il permiss 1 mais il schaner ed 1 mais il mars?

Na. La legislaziun davart il traffic sin via n'enconuscha naginas disposiziuns che permettessan d'etappar l'execuziun.

Èsi permess da far viadis puramain professiunals durant la privaziun dal permiss da manischar?

Na. Tenor l'art. 33 al. 1 da l'ordinaziun davart l'admissiun al traffic (OAT) chaschuna la privaziun dal permiss per emprender a manischar u dal permiss da manischar d'ina tscherta categoria (art. 3 al. 1) u sutcategoria (art. 3 al. 2) er la privaziun dal permiss per emprender a manischar u dal permiss da manischar da tut las categorias u sutcategorias.

Pertge vegn – ultra da la multa – anc prendì davent il permiss da manischar resp. pronunziada ina mesira?

Sch'i na sa tracta betg d'in surpassament minimal da las reglas da traffic, chaschuna ina cuntravenziun cunter la legislaziun davart il traffic sin via (lescha federala davart il traffic sin via ed ordinaziuns appartegnentas) duas differentas proceduras ch'èn da princip independentas ina da l'autra: la procedura penala (multa) che vegn realisada da l'autoritad da persecuziun penala dal lieu, nua che la cuntravenziun è vegnida commessa, e la procedura administrativa (avertiment, privaziun dal permiss e.u.v.) ch'è chaussa da l'autoritad administrativa. En tuttas duas proceduras ston vegnir surpigliads ils custs.

Cun auters pleds: in surpassament da las reglas da traffic chaschuna adina duas proceduras independentas che vegnan realisadas a medem temp da duas differentas instanzas. Tuttas duas instanzas survegnan il medem rapport da la polizia.

Dastg jau manar in vehichel a l'exteriur durant ina privaziun dal permiss da manischar?

Na. Per manar in vehichel ston ins posseder in permiss da manischar da la categoria respectiva. Er per manar vehichels a motor a l'exteriur dovri da princip in permiss da manischar valaivel. Il permiss da manischar vegn emess da quel stadi, nua che la manischunza u il manischunz ha ses domicil. Quest permiss da manischar vegn da princip renconuschì er en auters stadis. Sche l'autoritad emettenta prenda pia davent il permiss da manischar d'ina manischunza u d'in manischunz, croda er la permissiun da manischar a l'exteriur.