Sin mintga manaschi che tegna animals da niz ston esser avant maun avunda capacitads da deposit per ladim natiral (puschina, auas da silo, grascha). En il chantun Grischun è la capacitad da deposit necessaria reglada en l'art. 4 da l'Ordinaziun davart la protecziun da las auas en l'agricultura (OCPAAgr; DG 910.150). La possessura u il possessur dals stabiliments da deposit per ladim natiral sco er da silos da pavel sitg procura che quels vegnian installads, utilisads, tgirads e mantegnids (art. 15 al. 1 da la Lescha federala davart la protecziun da las auas (GSchG; SR 814.20). Ils stabiliments da deposit (inclusiv ils conducts) ston esser ermetics. Quests stabiliments ston esser intacts. Ultra da quai ston els vegnir mantegnids, tgirads ed utilisads correctamain (art. 28 al. 2 da l'Ordinaziun davart la protecziun da las auas, GSchV; SR 814.201).
Sut tschertas premissas po ina part dal ladim natiral vegnir deposità temporarmain tar terzas persunas.
Tge ston ins resguardar tar la construcziun da novs deposits da ladim natiral?
Valair valan las pretensiuns tecnicas tenor las agiuntas A4 ed A5 da l'agid d'execuziun Construcziuns ruralas e protecziun da l'ambient.
Controlla da l'ermeticitad: Novs recipients per deponer puschina ston vegnir controllads pertutgant lur ermeticitad. Proceder tenor las indicaziuns sin il formular Controlla da l'ermeticitad tar novas puschineras.
Tge ston ins resguardar, sch'ins depona temporarmain grascha sin in prà?
La durada da deposit maximala importa 8 emnas. Il ladimer sto vegnir cuvert cun in vlies. Nagina aua na dastga currer davent ed il lieu sto avair ina distanza suffizienta tar auas, tar tumbins d'entrada e tar drenaschas. Per evitar ina concentraziun da substanzas nutritivas ston ins midar mintga onn ils lieus dals deposits temporars. Grascha da giaglinom na dastga betg vegnir deponida temporarmain sin champs. Il deposit temporar sin champs n'è nagin remplazzament per in ladimer sper la stalla.
Tge ston ins resguardar, sch'ins depona ladim natiral tar terzas persunas?
Sch'i vegnan fatgas mesiras da construcziun vi dals deposits da ladim natiral u vi da las installaziuns da la stalla, sto il spazi da deposit vegnir mess a disposiziun cumplettamain tras spazis da deposit da l'agen manaschi. Contracts per deposits temporars n'èn betg permess.
En cas d'edifizis existents sto almain la mesadad dal spazi da deposit che vegn duvrà per il manaschi, vegnir garantì tras spazi da deposit da l'agen manaschi. Per maximalmain la mesadad (grascha/puschina) èsi pussaivel da far contracts per deposits temporars.
Datti in sustegn finanzial per la construcziun u per la sanaziun da deposits da ladim natiral?
Sut tschertas circumstanzas datti pussaivladads da sustegn, quai tant sur l'Ordinaziun davart las meglieraziuns da structura en l'agricultura (SVV; SR 913.1), sco er sur las mesiras da promoziun chantunalas. Ils detagls pon vegnir consultads sut stabiliments da ladim natiral e construcziun auta agricula.