En il Grischun crescha la surfatscha da guaud per passa 750 ha per onn. Prads e pastgiras svaneschan da la cuntrada e van a perder per l'agricultura. Cun rumir prads e pastgiras vul il chantun far frunt a quest svilup. Cun contribuziuns sustegna il chantun la lavur da proprietarias e proprietaris, da cultivaturas e cultivaturs, da vischnancas e d'organisaziuns.

Tge surfatschas duain vegnir recuperadas per l'agricultura?

I n'è betg la finamira da recuperar mintga surfatscha per l'agricultura. Raschunaivel èsi da rumir prads e pastgiras che creschan en, sche las surfatschas rumidas vegnan puspè cultivadas a pli lunga vista ed uschia tegnidas avertas tras l'activitad agricula.

Tgi po far ina dumonda per rumir prads e pastgiras ch'èn creschids en?

Proprietarias e proprietaris, cultivaturas e cultivaturs, vischnancas ed organisaziuns pon inoltrar al UAG ina dumonda da contribuziun . Las rumidas pon vegnir fatgas tant sin la surfatscha utilisada da l'agricultura sco er en il territori d'alpegiada. 

Co guarda ora il sustegn finanzial?

Il chantun sustegna las lavurs cun 16.50 francs per ura u cun max. 3000 francs per hectara. Il UAG decida da cas a cas, tge varianta da contribuziun che vegn resguardada.