Ina midada da la direcziun dal manaschi sto vegnir annunziada al UAG cun il formular Wechsel des Betriebsleiters/der Betriebsleiterin uschè baud sco pussaivel, il pli tard dentant in mais avant la surdada planisada. Las cundiziuns che vegnan menziunadas sin quest formular ston esser ademplidas. Al formular ston vegnir agiuntads la cumprova da la scolaziun agricula il contract da cessiun u da fittanza per ils edifizis e per il terren sco er il contract da cessiun per l'inventari viv e mort (animals, maschinas, pavel e. u. v.).
Per l'elavuraziun dals contracts e per ulteriuras infurmaziuns As drizzai per plaschair a la cussegliaziun da manaschis locala dal Plantahof.
Co annunziel jau ina midada?
Cun il formular Wechsel des Betriebsleiters/der Betriebsleiterin
- Per plaschair emplenir cumplettamain il formular.
- Laschar suttascriver da tut las partidas.
- Agiuntar la cumprova da scolaziun.
- Inoltrar fin mintgamai ils 30 da november a l'UAG.
- Il contract davart la surpigliada da l'inventari sco er il contract davart la surpigliada u la fittanza dal manaschi pon vegnir inoltrads posteriuramain fin ils 31 da mars.
Cura annunziel jau ina midada?
Nus recumandain da realisar ina midada sin il 1. da schaner, per ch'i na saja betg necessari da far annunzias posteriuras. Per ina procedura nunproblematica sto l'annunzia vegnir fatga fin ils 30 da november da l'onn precedent. La midada da la direcziun dal manaschi pon ins dentant annunziar posteriuramain fin il pli tard il 1. da matg.
Tge capita cun il numer chantunal dal manaschi?
La nova mainagestiun u il nov mainagestiun surpiglia il numer dal manaschi existent.
Tge ston ins resguardar areguard agate.ch ed areguard la banca da datas davart il traffic d'animals (BDTA)?
Nus furnin las datas da la nova mainagestiun u dal nov mainagestiun ad Agate. La Confederaziun generescha in nov numer dad Agate (che sa referescha a la persuna) e trametta quel cun in nov pled-clav per agate.ch a la nova mainagestiun u al nov mainagestiun. Tar cuminanzas da persunas sco per exempel cuminanzas da generaziuns survegnan tuts dus mainagestiuns in access separà.
La nova mainagestiun u il nov mainagestiun surpiglia il numer BDTA existent. Sch'ils animals vegnan surpigliads, vegnan els attribuids a la nova mainagestiun u al nov mainagestiun.
Tge capita cun las surfatschas e cun ils contracts da biodiversitad, da colliaziun e da qualitad da la cuntrada ch'èn vegnids cultivads fin ussa?
Las surfatschas inclusiv il cuntegn dals contracts da l'antecessura u da l'antecessur vegnan surpigliads. Las utilisaziuns e las annunzias da surfatschas pon vegnir adattadas il favrer a chaschun da l'enquista da las datas da structura.
Surfatscha da promoziun da la biodiversitad QI
- Las cultivaziun da questas surfatschas pon vegnir adattadas il favrer a chaschun da l'enquista da las datas da structura. Sch'i na dat naginas midadas durant l'emprim onn, vegn la durada dal contract prolungada automaticamain per 8 onns. La durada da la cultivaziun da mintga parcella è visibla en l'agriGIS.
Surfatschas da promoziun da la biodiversitad (SPB) QII e colliaziun
- Ils contracts existents vegnan surpigliads. Ils contracts pon bain vegnir stizzads, il dretg da contribuziuns scada alura dentant. L'onn da la surpigliada exista il dretg d'ina cussegliaziun gratuita davart quests contracts. La cussegliaziun sto vegnir pretendida fin il 1. da matg tar il biro ecologic cumpetent. Ils contracts pon vegnir rectifitgads a chaschun da la cussegliaziun. Las adattaziuns vegnan examinadas dal UAG e da l'Uffizi per la natira e l'ambient (UNA) e realisadas l'onn suandant
- Il nov contract per contribuziuns da biodiversitad e per la colliaziun vegn consegnà e sto vegnir suttascrit e returnà al UAG, sch'i duain vegnir pajadas contribuziuns.
Contribuziuns a favur da la qualitad da la cuntrada
- Valair vala la medema regla sco per las SPB QII e per ils objects da colliaziun.
- Il nov contract per contribuziuns a favur da la qualitad da la cuntrada per la colliaziun vegn consegnà e sto vegnir suttascrit e returnà al UAG, sch'i duain vegnir pajadas contribuziuns.
Cura e co èsi da far l'annunzia per ils geners da pajaments directs e per la cumprova da prestaziun ecologica (CPE)?
L'annunzia per ils geners da pajaments directs e la cumprova da prestaziun ecologica (CPE) vegn fatga a chaschun da l'endataziun da l'atun da l'onn precedent. Sche la direcziun dal manaschi mida, vegnan surpigliadas las datas da l'antecessura u da l'antecessur. Excepziunalmain èsi pussaivel da far adattaziuns fin e cun l'enquista da las datas da structura il favrer da l'onn da contribuziun, sch'ina controlla da quests programs è anc pussaivla quel mument.