Tras las meglieraziuns da structura en il sectur da la construcziun auta agricula ans engaschain nus per la meglieraziun da las cundiziuns da viver e da las relaziuns economicas da las famiglias purilas. Els survegnan uschia structuras da manaschi adequatas e pon reagir pli svelt e meglier sin las midadas dal martgà. I vegnan pajadas contribuziuns betg rembursablas per construir u per renovar edifizis d'economia per animals che maglian pavel setg sco er per construir u per renovar edifizis communabels sco alps, chascharias e manaschis pitschens. L'autezza da las tariffas da contribuziun variescha tut tenor la zona e la mesira da construcziun.

Tar la construcziun auta agricula elavurain nus circa 30 dumondas da contribuziun per onn, tut tenor ils credits che ans stattan a disposiziun. Nus infurmain las puras ed ils purs davart la procedura da project ed als cussegliain en dumondas da la tecnica da construcziun.

Per survegnir subvenziuns per la construcziun auta agricula ston vegnir respectadas las prescripziuns da la legislaziun davart la protecziun da la natira, da la patria, da l'ambient e da las auas sco er da la planisaziun dal territori, da la protecziun dals animals e da la prevenziun d'accidents.