Parcellas, ovras ed edifizis agriculs ch'èn vegnids sustegnids cun contribuziuns federalas e chantunalas, vegnan inscrits cun ina remartga correspundenta en il register funsil. Ensemen cun questa remartga vegn tranter auter inscrit in scumond d'utilisaziun per in auter intent che vala 20 onns (suenter il pajament final da la contribuziun federala) sco er in scumond da parcellaziun da durada illimitada. Ultra da quai vala en quest connex er in'obligaziun da restituir las subvenziuns. Quella vala medemamain 20 onns.

Sch'i èn avant maun motivs impurtants, vegnan permessas excepziuns dal scumond da l'utilisaziun per in auter intent. Tals motivs existan per exempel tar l'enzonaziun da terren da construcziun ubain en cas d'ina permissiun da construcziun per in'utilisaziun betg agricula dals edifizis. Sch'ina parcella, in'ovra u in edifizi agricul vegn – en tals cas motivads – utilisada pli baud per in auter intent che per l'intent agricul previs, q.v.d. avant la scadenza dal termin da 20 onns menziunà, ston las contribuziuns federalas e chantunalas vegnir restituidas proporziunalmain.