Las epidemias d'animals èn malsognas transmissiblas che pericliteschan effectivs entirs d'animals, ch'èn transmissiblas per umans, che han grevas consequenzas economicas u che restrenschan il commerzi internaziunal.
En il cumbat cunter epidemias d'animals differenziescha la legislaziun tranter:
epidemias d'animals fitg contagiusas , p.ex. la zoppina. La zoppina è ina da las malsognas da virus las pli catastrofalas d'animals da niz, e quai sin tut il mund. I na dat naginas pussaivladads da curar animals malsauns. La zoppina n'è betg privlusa per ils umans.
epidemias d'animals che ston vegnir extirpadas , p.ex. la "BSE" (sturnadad bovina) che tutga tar la gruppa da malsognas da la encefalopatia spongiforma transmissibla (EST) – tar ils umans sa manifestescha ella sco malsogna da Creutzfeld-Jakob (CJD). Tut las EST han in lung temp d'incubaziun ed han adina consequenzas mortalas.
pidemias che ston vegnir cumbattidas, p.ex. l'infecziun salmonella-enteritidis da las giallinas. Salmonellas èn la chaschun principala dad infecziuns da victualias tar ils umans. In reservuar sa chatta tar il giallinam da niz.
La pesta americana e la pesta ascha dals avieuls èn tenor la lescha davart epidemias d'animals medemamain epidemias d'animals che sto vegnir cumbattidas. Questas duas malsognas d'avieuls vegnan cumbattidas per sminuir tant sco pussaivel las consequenzas sanitaras ed economicas per ils avieuls e per las apiculturas e per ils apiculturs.
epidemias che ston vegnir controlladas, p.ex. l'abort chlamydien da las nursas e da las chauras (in'epidemia d'abort). Sch'in effectiv d'animals è infectà cun questa malsogna, è quai in grond privel per dunnas en speranza.

Tut las epidemias d'animals fitg contagiusas ed in grond dumber da las epidemias d'animals che ston vegnir extirpadas èn vegnidas extirpadas gia da pli baud en Svizra. Cun in'activitad da controlla e da surveglianza adattada segirain nus che "malsognas extirpadas" – per cas ch'ellas vessan puspè da rumper ora –vegnian percorschidas e tegnidas en frain ad uras. Cun la surveglianza segirain nus medemamain che novas epidemias d'animals vegnian percorschidas ad uras.