La purschida da victualias è ozendi fitg multifara. Quest svilup pussibilitescha a la consumenta ed al consument da sa nutrir en moda bler pli variada e pli sauna che quai ch'era il cas tar generaziuns da pli baud. Il medem mument na po la consumenta u il consument per regla betg pli avair ina invista en il process da producziun e da vendita da las victualias. Els èn dependents che las producentas e ch'ils producents surveglian e garanteschan cuntinuadamain – en il rom d'ina autocontrolla – la qualitad d'in product. Per quest motiv vegn dà en la legislaziun da victualias grond pais a l'autocontrolla da la producenta e dal producent ed a la protecziun cunter l'engion da las consumentas e dals consuments. En l'artitgel d'intent da questa legislaziun èn menziunads ils suandants puncts:

• la protecziun da la consumenta e dal consument cunter victualias e cunter objects da diever che pericliteschan la sanadad
• la garanzia da tractar las victualias en moda igienica
• la protecziun da la consumenta e dal consument cunter engions en connex cun victualias (p.ex. decleraziuns falladas u engianontas)

 

Il sectur da la segirezza da victualias da l'USVA è responsabel decisivamain per exequir la legislaziun da victualias, per che l'artitgel d'intent menziunà qua survart possia vegnir resguardà.