En il sectur dals implants da sport po – en il senn da la promoziun dal sport e dal svilup economic – vegnir promovida ina infrastructura da sport che tegna quint dals basegns. Ils giavischs da la promoziun dal sport (trenament e concurrenza) sco er dal svilup economic (attractivitad da l'economia locala e turissem) vegnan fixads en il Concept per implants da sport d'impurtanza chantunala (CISIC).

Tar ils implants da sport vegnan differenziadas las duas categorias implants d'impurtanza naziunala (implants CISIN) e d'impurtanza chantunala u regiunala (implants CISIC). Investiziuns en

• implants CISIN pon vegnir promovidas cun contribuziuns federalas (maximalmain 45% dals custs) e contribuziuns chantunalas (maximalmain 25% dals custs).
  
• implants CISIC pon vegnir promovidas cun contribuziuns chantunalas (maximalmain 25% dals custs).

Las instituziuns purtadras d'implants CISIN e CISIC promovids s'obligheschan da far ina cunvegna d'utilisaziun da plirs onns cun la federaziun da sport chantunala u naziunala. Uschia vegni garantì che l'implant da sport po vegnir utilisà tant dal sport d'elita sco er dal sport da massa per cundiziuns cunvegnentas e che l'instituziun purtadra s'engascha da realisar occurrenzas da sport da la disciplina da sport correspundenta che han ina impurtanza chantunala, naziunala u internaziunala.