Tgi che viva en Svizra ed en il Grischun po profitar gratuitamain d'ina scolaziun da basa excellenta. Las scolas autas ed il sistem dual da la furmaziun professiunala genereschan expertas ed experts autamain cumpetents. Teams da perscrutaziun internaziunals lavuran en il Grischun vi da soluziuns innovativas per l'avegnir che vegnan a sa pajar en la pratica.

Sistem da furmaziun d'emprima classa

La furmaziun, la perscrutaziun e l'innovaziun van maun en maun. Las scolas publicas da la Svizra tutgan tar las meglras dal mund. Las abitantas ed ils abitants dal Grischun survegnan ina scolaziun excellenta da la scolina fin al diplom universitar. Il Grischun ha a Tavau, Mustér, Ftan u Zuoz ultra da quai internats renumads e scolas privatas internaziunalas.

Emprendissadi, perscrutaziun e pratica en l'economia s'endentan perfetgamain. Il sistem da furmaziun dual da la Svizra avra – ultra d'ina via ad ina carriera universitara – scolaziuns spezialas en 245 professiuns cun ina relaziun directa a la pratica. Suenter la scolaziun terminada n'èsi betg a fin cun emprender en il Grischun: L'Institut per furmaziun supplementara professiunala (IFSP) promova in emprender per vita duranta.

Scolas autas spezialisadas damanaivlas a la pratica

Cun orientaziun a l'applicaziun perscruteschan ed instrueschan la Scola auta spezialisada dal Grischun (SASGR) a Cuira, la Scola auta spezialisada da la Svizra Orientala (OST) a Son Gagl, Rapperswil e Buchs, la Scola auta spezialisada dal Vorarlberg (FHV) a Dornbirn, la Scola universitara professiunala da la Svizra taliana (SUPSI) a Locarno/Manno sco en spezial er la Scola auta spezialisada turitgaisa (SAS-ZH), la scola auta spezialisada la pli gronda da la Svizra cun var 20'000 studentas e students.

Universitads da renum mundial

La Scola politecnica federala Turitg (SPFT) scolescha en spezial en il sectur MINT prospectiv (matematica, informatica, scienzas natiralas e tecnica) persunas spezialisadas en studis da bachelor e da master. Tenor ils QS World University Rankings 2022 è la SPFT la scola auta dominanta da l'Europa continentala. Cun l'Universitad da Turitg (UZH) sco er cun l'Universitad da Son Gagl (HSG) vegnan vitiers duas ulteriuras scolas autas da renum mundial. L'Universitad dal Liechtenstein a Vaduz, l'Universitad privata en il Principadi da Liechtenstein (UFL) a Triesen e l'Universitad da la Svizra taliana (USI) a Lugano cumpletteschan la vasta purschida universitara.

Savida speziala progressiva

Funtauna: Uffizi federal da statistica (UST), december 2022 e rapport annual davart las universitads 2021, intschess da var 1 ura cun l'auto davent dal Grischun

Lieu da perscrutaziun cun colliaziuns internaziunalas

Il Grischun sco lieu da perscrutaziun attira scienziadas e scienziads autamain qualifitgads da tut il mund: 60 pertschient da tut las perscrutadras e perscrutaders en il Grischun derivan da l'exteriur. Ils instituts da perscrutaziun fan part da raits internaziunalas. Da quai naschan en il Grischun regularmain spin-offs novs e productivs.

Punct da contact en la rait da perscrutaziun grischuna

L'Academia Raetica cun sedia a Tavau promova la scienza, la perscrutaziun e la furmaziun en il Grischun e conturns. Dals commembers fan part passa ventg instituts da perscrutaziun, scolas autas e clinicas. L'Academia Raetica gida la generaziun giuvna scientifica, collia ses commembers e represchenta ses interess.

Instituts da perscrutaziun renumads

L'Institut da perscrutaziun AO Tavau (ARI) è internaziunalmain dominant en la perscrutaziun preclinica per la chirurgia d'accidents e l'ortopedia. L'ARI occupa a Tavau passa 250 perscrutaders e collavuraturs. L'ARI vegn sustegnì da la AO Foundation, la rait internaziunala la pli impurtanta d'experts medicinals.

Tavau sco lieu da cura ha prendì sco piunier vias novas per tractar malsognas dal pulmun, e quai gia avant passa 100 onns. L'Institut svizzer da retschertgas davart allergias ed asma (ISRA) cuntinuescha cun questa tradiziun. Da la relevanza da la perscrutaziun dal ISRA dattan perditga nundumbraivels citats en publicaziuns scientificas.

Il Christine Kühne – Center for Allergy Research and Education (CK-CARE) a Tavau è en l'entira Europa ina da las iniziativas privatas las pli grondas per ina perscrutaziun globalisada sin il champ da l'allergologia.

Il WSL Institut per la perscrutaziun da la naiv e da las lavinas (SLF) a Tavau è ina partiziun da la Scola politecnica federala Turitg (SPFT). Il SLF fa perscrutaziun da basa ed applitgada e porscha servetschs per la protecziun cunter lavinas ed ulteriurs privels da la natira alpina. En ses champ è el ina instanza dominanta internaziunalmain. Il center da perscrutaziun CERC fundà l'onn 2021 è ina part da l'institut WSL e fa retschertgas davart la midada dal clima, davart eveniments extrems e davart privels da la natira en il territori alpin.

L'Observatori fisical-meteorologic Tavau / Center mundial da radiaziun (OFMT/CMR) perscrutescha a Tavau l'influenza da la radiaziun dal sulegl sin il clima mundial, sviluppa instruments per mesirar la radiaziun e funghescha per la World Meteorological Organisation (WMO) sco center da calibraziun per instruments da mesiraziun.

CSEM è in center d'innovaziun da tecnologia svizzer, che sviluppa tecnologias innovativas che procuran per effects socials impurtants e che transferescha quellas en l'industria per rinforzar l'economia. L'organisaziun da non-profit public-privata ha in renum internaziunal e sustegna las activitads innovativas d'interpresas dals secturs da la producziun da microprecisiun, da las tecnologias digitalas e da l'energia persistenta. Per pudair ademplir sia missiun sco colliaziun tranter la perscrutaziun e l'economia lavuran passa 600 collavuraturas e collavuraturs stretgamain cun ils partenaris principals da l'industria e da la perscrutaziun, e quai a Landquart ed en 5 ulteriurs lieus.