L'agid a victimas dal Grischun po intermediar e finanziar persunas spezialisadas (p.ex. in'advocata, in psicoterapeut).

Agid immediat

En il rom da l'agid immediat tenor la lescha davart l'agid a victimas finanziescha il chantun ils custs per agids ch'èn necessaris per cuvrir ils basegns ils pli urgents en consequenza d'in malfatg. En spezial èn quai:

• 21/35 dis alloschi d'urgenza
• 5 uras cussegliaziun d'ina advocata u d'in advocat
• 15/40 uras psicoterapia 
• emprim provediment medicinal 
• custs da translaziun
• custs transitorics, custs da transport e custs da segirada

Agid a pli lunga vista

Sche la victima dovra ulteriur sustegn per vegnir a fin cun las consequenzas d'in malfatg, vegnan ils custs surpigliads dal tuttafatg u per part, tut tenor las relaziuns finanzialas da la victima. L'agid a victimas paja contribuziuns per agid a pli lunga vista, sche l'agid è necessari, adattà e commensurà e sche nagin auter (assicuranzas, giurisdicziun gratuita, delinquent u delinquenta) na surpiglia ils custs (subsidiaritad).

Ulteriuras infurmaziuns / formulars

Ulteriuras infurmaziuns davart l'agid immediat e davart l'agid a pli lunga vista chattais Vus en las suandantas directivas (mo per tudestg):

• Recumandaziun da la conferenza svizra da l'agid a victimas per surpigliar ils custs per l'agid giuridic da terzas persunas dals 22 d'october 2019
• Recumandaziun da la conferenza svizra da l'agid a victimas per surpigliar ils custs per l'agid psicologic da terzas persunas dals 13 da favrer 2018
• Document da basa «Agid a victimas ed agid social» da la conferenza svizra da l'agid a victimas e da la conferenza svizra da l'agid social (COSAS) dals 18 da settember 2018

Per ulteriuras dumondas davart las tariffas, ils onuraris e las tariffas per ura en il chantun pudais Vus gugent As drizzar al post da cussegliaziun da l'agid a victimas dal Grischun (+41 81 257 31 50).

Dumondas da prolungaziun

Per ina dumonda da prolungar l'agid psicoterapeutic resp. l'agid d'ina advocata u d'in advocat stattan a disposiziuns ils suandants formulars (mo per tudestg):

• Formular: Rapport da terapia
• Formular: Dumonda per garanzia per ils custs d'advocat

Donns materials en consequenza dal malfatg na vegnan betg cuvrids tras l'agid a victimas. Ulteriuras infurmaziuns davart indemnisaziuns e satisfacziuns en il rom da la lescha davart l'agid a victimas chattais Vus qua.