La premissa per manar ina vita independenta è quella d'integrar la persuna ch'è capabla da lavurar en il mund da lavur.

Ils servetschs socials regiunals As cusseglian en dumondas davart la lavur e davart l'integraziun professiunala. Els sustegnan la reintegraziun svelta da persunas ch'èn capablas da lavurar tras l'intermediaziun en programs d'engaschament ed en firmas socialas.

La finamira da mesiras per l'integraziun professiunala è quella da rinforzar e da mantegnair las cumpetenzas individualas (p.ex. cumpetenzas linguisticas, cumpetenzas spezialisadas che sa refereschan a la professiun, cumpetenzas socialas). A medem temp èsi impurtant d'installar contacts socials e raits da sustegn.

La participaziun ad ina mesira d'integraziun professiunala sa basa sin il princip da vicendaivladad: La persuna che survegn sustegn finanzial sa participescha ad ina mesira che la gida directamain a meglierar sias schanzas sin il martgà da lavur. La vischnanca surpiglia ils custs per la mesira d'integraziun. La persuna che survegn sustegn finanzial survegn lura in supplement d'integraziun per ses engaschament.

Il scleriment e l'annunzia per in program d'engaschament u per ina firma sociala vegnan fatgs dal servetsch social regiunal cumpetent. Per ina participaziun definitiva è necessaria ina garanzia per ils custs da vart da la vischnanca cumpetenta.

Programs d'engaschament da l'uffizi chantunal per industria, mastergn e lavur

L'uffizi chantunal per industria, mastergn e lavur porscha en tut il chantun Grischun programs d'engaschament per l'integraziun sociala u professiunala. Oriundamain èn quests programs d'engaschament vegnids stgaffids per facilitar a las persunas che tschertgan ina plazza e che retschaivan daners da dischoccupaziun la reintegraziun en il martgà da lavur. Suenter èn els vegnids mess a disposiziun er a persunas che retschaivan agid social.

Differentas plazzas da trenament stattan a disposiziun en tut il chantun.

• Programs d'engaschament da l'uffizi chantunal per industria, mastergn e lavur

Firma sociala Dock Grischun

Dock Grischun porscha lavur per persunas che na chattan betg ina plazza sin il martgà da lavur e che vulessan tuttina lavurar. I sa tracta qua d'incumbensas da clientella realas cun prescripziuns da termins e da qualitad che ston vegnir observadas. Dock Grischun organisescha la lavur uschia che nagin n'è surdumandà.

Dock Grischun dispona da plazzas da lavur en ils suandants secturs:

• industria
• recicladi 
• brocki gronda 
• rumidas

Las persunas che lavuran en la gruppa Dock survegnan in salari assicurà e pon puspè finanziar sezzas ina part da lur bains necessaris per viver.

• Dock Grischun

Rait sociala – post spezialisà per l'integraziun en il mund da lavur (Crusch Cotschna Svizra dal Grischun)

Il post spezialisà per l'integraziun en il mund da lavur (Rait sociala) sustegna per incumbensa da l'uffizi dal servetsch social e da las vischnancas persunas, che han il dretg da survegnir agid social, tar l'integraziun professiunala en il mund da lavur u tar l'integraziun sociala tras activitads praticas. El intermediescha a persunas che retschaivan agid social programs d'engaschament, engaschaments tar organisaziuns da non-profit, praticums e.u.v.

L'annunzia vegn fatga dals servetschs socials regiunals u da las autoritads d'agid social da las vischnancas.

• Rait sociala (Crusch Cotschna Svizra dal Grischun)

Contact

Avais Vus dumondas u duvrais Vus sustegn? Fixai in termin da cussegliaziun. As drizzai per plaschair al servetsch social regiunal da Vossa regiun.

Survista dals servetschs socials regiunals en il chantun Grischun