Tar l'adopziun internaziunala sa tracti d'ina adopziun d'in uffant da l'exteriur.

La Svizra è commembra da la convenziun da Den Haag davart las adopziuns. La finamira primara da la convenziun da Den Haag è l'introducziun da prescripziuns da protecziun per che las adopziuns internaziunalas vegnian fatgas per il bainstar dals uffants, ed il rapiment e la vendita d'uffants sco er il commerzi cun ils uffants possian vegnir impedids. Pussaivlas èn er adopziuns da stadis che n'han betg suttascrit la convenziun da Den Haag. En quests cas sa differenzieschan las proceduras da las adopziuns da stadi a stadi. Il stadi d'origin da l'uffant è decisiv per la procedura che vegn applitgada.

Las premissas per in'adopziun sa differenzieschan tut tenor il stadi d'origin da l'uffant. In'adopziun cuminaivla è pussaivla mo, sch'ils geniturs èn maridads. Da princip ston esser ademplidas almain las suandantas premissas:

• Ils geniturs adoptivs che candideschan ston ubain esser maridads dapi almain 3 onns ubain tuts dus avair almain 28 onns.
• La differenza da vegliadetgna tranter ils geniturs adoptivs futurs e l'uffant sto esser almain 16 onns.
• La differenza da vegliadetgna tranter ils geniturs adoptivs futurs e l'uffant na dastga da princip betg esser dapli che 45 onns.
• Ils geniturs biologics ston avair acceptà l'adopziun.

Sin la pagina d'internet da l'uffizi federal da giustia chattais Vus ina glista da tut ils stadis commembers da la convenziun da Den Haag davart las adopziuns sco er las infurmaziuns davart ils stadis da la confederaziun, che dattan scleriment davart las differentas premissas specificas naziunalas per in'adopziun.