Per recepir uffants e giuvenils dovri ina permissiun, sch'i vegnan admess durant il di u la notg il medem mument quatter u dapli persunas minorennas per l'assistenza, per l'educaziun, per la scolaziun, per l'observaziun u per il tractament. L'uffizi dal servetsch social è cumpetent per conceder la permissiun. Ultra da quai ha el la surveglianza.

L'uffizi dal servetsch social conceda resp. renovescha ina permissiun da manaschi, sche las chasas d'uffants e da giuvenils observan las prescripziuns da las directivas da qualitad da l'uffizi dal servetsch social per instituziuns destinadas a l'integraziun sociala d'uffants, da giuvenils e da persunas giuvnas creschidas. Las directivas da qualitad cumpletteschan l'ordinaziun federala davart il plazzament d'uffants per la tgira e l'adopziun sco er la lescha davart ils uffants confidads dal chantun Grischun.