Famiglias da tgira senza organisaziun per il plazzament d'uffants en famiglias (OPUF)

Las famiglias da tgira dovran in accumpagnament qualifitgà e sustegn per dumagnar bain lur incumbensa pretensiusa. Il post spezialisà per famiglias da tgira ed adopziuns da l'uffizi dal servetsch social accumpogna ils geniturs da tgira. Sch'ils geniturs da tgira dovran sustegn, pon els contactar il post spezialisà. Sche pussaivel organisescha il post spezialisà mintga onn ina furmaziun supplementara per geniturs da tgira. Sin dumonda po il post spezialisà sustegnair finanzialmain furmaziuns supplementaras individualas.

En il rom da la planisaziun d'assistenza individuala sto il post ch'è cumpetent per il plazzament da l'uffant da tgira (p.ex. curatella professiunala, autoritad per la protecziun d'uffants e da creschids) sclerir, sch'in ulteriur accumpagnament da las famiglias da tgira è necessari. Quel po vegnir delegà ad in post spezialisà u ad in'organisaziun per il plazzament d'uffants en famiglias.

Famiglias da tgira che collavuran cun in'organisaziun per il plazzament d'uffants en famiglias (OPUF)

Las organisaziuns per il plazzament d'uffants en famiglias accumpognan e sustegnan lur famiglias da tgira. Ultra da quai èn ellas cumpetentas per la furmaziun supplementara da lur famiglias da tgira.

Recumandaziuns da la CDAS/COPUC pertutgant collocaziuns ordaifer la famiglia

Igl è il giavisch dal chantun Grischun che collocaziuns ordaifer la famiglia vegnian iniziadas ed exequidas en in'auta qualitad e ch'ils interess dals uffants e dals giuvenils vegnian preservads. Ils ultims onns èn perquai vegnids sviluppads, en collavuraziun cun posts spezialisads, criteris da scleriment per mantegnair e per optimar l'auta qualitad da las decisiuns en il sectur da las collocaziuns ordaifer la famiglia. Per il chantun Grischun èsi impurtant ch'il sectur da la collocaziun ordaifer la famiglia possia garantir transparenza e cuntanscher acceptanza e confidenza en las mesiras.