Relaziuns da tgira en famiglia

Ils geniturs da tgira u ils confamigliars che prendan in uffant en tgira, dovran ina permissiun, sche la relaziun da tgira dura passa 1 mais. Quai vala er per ils geniturs da tgira u per ils confamigliars che tgiran gratuitamain in uffant sco er per ils geniturs da tgira che collavuran cun in'organisaziun per il plazzament d'uffants en famiglias.

Per recepir uffants e giuvenils en il rom d'intervenziuns en cas da crisa e da plazzaments da distgargia dovri ina permissiun a partir da l'emprim di. Ultra da quai ston geniturs da tgira che vulan tgirar uffants e giuvenils en il rom d'intervenziuns en cas da crisa e da plazzaments da timeout collavurar cun in'organisaziun per il plazzament d'uffants en famiglias.

En il chantun Grischun conceda l'uffizi dal servetsch social permissiuns per relaziuns da tgira. El examinescha tranter auter las premissas persunalas, la qualificaziun educativa sco er la situaziun d'abitar dals geniturs da tgira che candideschan.

Organisaziuns per il plazzament d'uffants en famiglias (OPUF)

En il chantun Grischun dovran organisaziuns per il plazzament d'uffants en famiglias ina permissiun. Ellas dovran quella er, sch'ellas han ina permissiun da manaschi da lur chantun da staziunament resp. sch'ellas adempleschan l'obligaziun d'annunzia da lur chantun da staziunament. Las organisaziuns ston ademplir las directivas da qualitad envers organisaziuns per il plazzament d'uffants en famiglias dal chantun Grischun ed observar las tariffas maximalas.