Ils 23 da schaner 2023 è entrada en vigur la Lescha federala davart il register penal informatisà VOSTRA (Lescha davart il register penal, LRegP; CS 330) ensemen cun la nova Ordinaziun davart il register penal informatisà VOSTRA (Ordinaziun davart il register penal, ORegP; CS 331) Il legislatur federal ha profità da questa revisiun da lescha per reglar sin nivel naziunal en moda unitara, co ch'ils extracts dal register penal duain vegnir tractads en il sectur da la tgira d'uffants da las canortas d'uffants, da las organisaziuns da geniturs da di, da chasas d'uffants e da giuvenils, da geniturs da tgira e d'organisaziuns per il plazzament d'uffants en famiglias. Per quest intent è l'Ordinaziun davart il plazzament d'uffants per la tgira e l'adopziun (Ordinaziun davart ils uffants confidads; OPUA; CS 211.222.338) vegnida adattada per ils 23 da schaner 2023.

En cas da collavuraturas e da collavuraturs che vegnan engaschads da nov, è l'Uffizi chantunal dal servetsch social obligà da controllar, avant l'entrada en plazza, l'extract 2 per las autoritads. Per che l'Uffizi chantunal dal servetsch social possia far questa controlla, sto el vegnir infurmà a temp, pia avant la suttascripziun dal contract, davart la nova collavuratura u il nov collavuratur. Per controllar las novas collavuraturas ed ils novs collavuraturs è previs il formular «Extract 2 dal VOSTRA per las autoritads» (nova persuna spezialisada). Quest formular tramettais Vus a vostra@soa.gr.ch.

L'Uffizi chantunal dal servetsch social è plinavant obligà da controllar ina giada per onn tut las collavuraturas ed ils collavuraturs cun agid d'in extract 2 per las autoritads. Per la controlla annuala è previs il muster glista da collavuraturas e collavuraturs per l'examinaziun annuala VOSTRA (mo per tudestg). Questa glista tramettais Vus a vostra@soa.gr.ch.