Gruppas da gieu èn purschidas che stattan a disposiziun durant intginas uras ad uffants dal sectur prescolar a partir da 2½ onns fin a l'entrada en scolina. Ellas cumpiglian p.ex. gruppas da creativitad, da malegiar, da zambregiar, da musica, da guaud, da lingua, da natira ed uschia vinavant.

Las uras d'avertura d'ina gruppa da gieu importan

• maximalmain 30 uras per emna;
• maximalmain 3 uras ina suenter l'autra.

Ina gruppa da gieu porscha per uffant

• maximalmain trais sequenzas assistidas per emna, ma il medem di dastga avair lieu mo ina sequenza assistida.

Gentars assistids ed assistenza da mezdi na vegnan per regla betg purschids.

Recumandaziuns per gruppas da gieu en il Grischun

Las gruppas da gieu en il chantun Grischun èn ina purschida impurtanta da la furmaziun tempriva.

Per reglar questas purschidas da furmaziun, per las distinguer d'autras purschidas da l'uffanza tempriva e per exprimer la voluntad politica è vegnida elavurada – en collavuraziun cun persunas spezialisadas grischunas – la regulaziun qua avant maun. Questa regulaziun sa drizza a tut las gruppas da gieu en il chantun Grischun. Ella definescha, tge ch'ina gruppa da gieu è – cunzunt per distinguer las gruppas da gieu da las canortas d'uffants. Plinavant cuntegna ella recumandaziuns e concretisescha las prescripziuns giuridicas.

Per evaluar las atgnas basas en scrit stat a disposiziun in formular a la gruppa da gieu. Quel gida ad analisar la situaziun areguard la realisaziun da las recumandaziuns ed a reflectar las pussaivladads da meglieraziun sco er il svilup da la qualitad.

Finanziaziun

Las gruppas da gieu vegnan finanziadas tras donaziuns e tras contribuziuns dals geniturs.