Supplementarmain a la permissiun dovran purschidas da la tgira d'uffants cumplementara a la famiglia en il chantun Grischun ina renconuschientscha, per che las famiglias che fan diever da lur purschida, possian survegnir reducziuns dals custs da tgira. Las premissas las pli impurtantas per conceder la renconuschientscha èn l'observaziun da las prescripziuns chantunalas davart las tariffas e la correspundenza da la planisaziun da la purschida. Plinavant èn purschidas renconuschidas confessiunalmain neutralas e betg limitadas a tschertas gruppas.

L'assistenza vegn favuraivla tras canortas d'uffants admessas e tras organisaziuns da geniturs da di extrachantunalas. Ina purschida d'assistenza extrachantunala vegn admessa, sch'ella metta a disposiziun al chantun las infurmaziuns necessarias per exequir la lescha davart la promoziun da la tgira d'uffants cumplementara a la famiglia en il chantun Grischun e sche la purschida vegn permessa da l'autoritad cumpetenta dal chantun respectiv, è confessiunalmain neutrala e betg limitada a tschertas gruppas.

Concernent l'admissiun pon purschidas extrachantunalas contactar l'uffizi dal servetsch social sur la suandanta adressa:

KUffizi dal servetsch social dal Grischun
Reducziun da la tgira d'uffants cumplementara a la famiglia
Grabenstrasse 8
7001 Cuira
Tel. +41 81 257 53 96
quint@soa.gr.ch

En il chantun Grischun vegnan las canortas d'uffants finanziadas tras contribuziuns chantunalas e communalas sco er tras contribuziuns da las persunas cun la pussanza dals geniturs. Il Cussegl grond fixescha en il preventiv il credit per finanziar las reducziuns dals custs. Il total da las reducziuns dals custs surpiglian mintgamai per la mesadad il chantun e las vischnancas. Il domicil dals uffants tgirads fixescha la vischnanca cumpetenta. Per finanziar la tgira d'uffants cumplementara a la famiglia vegnan calculads custs normads. Ils custs normads sa basan sin la media dals custs da las purschidas renconuschidas ed economicas. La basa furman las calculaziuns dals custs controlladas dals 3 onns passads.

Plinavant sustegna la confederaziun instituziuns d'assistenza cun contribuziuns per installaziuns ni construcziuns, per extender la purschida sco er per coordinar l'assistenza en famiglias da di. Infurmaziuns pli detagliadas chattais Vus sin la pagina d'internet da l'uffizi federal d'assicuranzas socialas (UFAS).

Per conceder las reducziuns dals custs è vegnida sviluppada la software quint. Tut ils process tranter l'Uffizi chantunal dal servetsch social e las purschidas d'assistenza vegnan liquidads sur quint. Quai cumpiglia l'annunzia dals uffants e las relaziuns da tgira concludidas, l'annunzia da las uras da tgira effectivas (datas d'utilisaziun) sco er il rendaquint da las reducziuns dals custs. Purschidas d'assistenza renconuschidas survegnan access a quint.
Il manual d'utilisaders per il quint per purschidas d'assistenza sa chatta qua.

La KITAplus pussibilitescha ina participaziun a la tgira d'uffants cumplementara a la famiglia per uffants cun in impediment. Il chantun surpiglia ils custs supplementars che resultan pervia da l'impediment. Ils geniturs d'in uffant cun impediments pajan ils custs d'assistenza regulars. Per l'admissiun ad ina KITAplus n'è betg decisiva la diagnosa, mabain la lavur d'assistenza pli gronda en las canortas d'uffants ed il basegn dal persunal d'assistenza per il coaching e per l'intermediaziun da savida tras ina persuna spezialisada. En la canorta d'uffants sezza na vegn purschida – en il rom dal KITAplus – ni tras il persunal d'assistenza ni tras l'educaziun prescolara pedagogic-curativa ina promoziun speziala en il senn terapeutic. Anzi, la canorta porscha conturns che promovan l'uffant. En cas d'ina dumonda decida la canorta d'uffants, sch'ella ha la capacitad prender si in uffant cun impediments. Per lescha n'exista nagina obligaziun d'admissiun. Qua (link al fegl d'infurmaziun) chattais Vus tut las infurmaziuns davart KITAplus.