Funcziun

L'uffizi dal servetsch social porscha prestaziuns essenzialas per schliar problems socials e per la gulivaziun sociala. El sustegna singuls umans, famiglias, gruppas sco er la communitad.

Per pudair dumagnar en moda efficazia situaziuns d'urgenza socialas concretas dovri dapli che l'agid en il cas singul. Per schliar problems socials èsi impurtant d'identifitgar e da gulivar a temp differents basegns ed interess da la societad sco er diversas perspectivas socialas. Situaziuns d'urgenza socialas sa manifesteschan sco problems tar singulas persunas, famiglias e gruppas (particularmain er gruppas marginalas) u en ina communitad. L'uffizi dal servetsch social porscha perquai sustegn sin quests quatter plauns.

Maletg da l'uman

Nus respectain mintga uman en sia dignitad. Umans èn capabels d'emprender, da sa midar e da sa sviluppar durant l'entira vita. Cussegliond ed accumpagnond ans engaschain nus ensemen cun las persunas pertutgadas. Nossa finamira èsi da mitigiar, da dumagnar e d'impedir problems en moda persistenta.

La lavur da l'uffizi dal servetsch social è lavur cun e per l'uman. Noss maletg da l'uman s'orientescha a la tradiziun umanistica. Nus entrain en contact cun umans spetgond che svilups positivs èn adina puspè pussaivels – er en situaziuns che paran desperadas. Er sch'ils conturns socials en il cas singul pon difficultar la realisaziun da quest princip, ans orientain nus en nossa lavur al princip fundamental da l'uman ch'è abel da sa sviluppar vinavant. Nossas activitads n'èn betg concepidas a curta vista. Ellas duain far effect a temp ed en moda duraivla. Per cuntanscher quai, integrain nus las persunas pertutgadas en moda directa, activa e concreta en il process da midament. Nus ans basain sin lur fermezzas e sin lur resursas.

Purschida

Nossas purschidas s'orienteschan vi da las circumstanzas socialas sco er vi da la situaziun da vita e vi da las fermezzas d'umans che basegnan agid. Nus lavurain tenor metodas professiunalas renconuschidas.

Las situaziuns da vita concretas d'umans, lur abilitads e fermezzas particularas e las cundiziuns socialas èn ils aspects, als quals nus orientain nossas prestaziuns da servetsch. Nus essan conscients che las situaziuns da vita da singulas persunas ed ils conturns socials pon pretender mesiras cuntradictoricas. En talas situaziuns è impurtanta la gulivaziun sociala.

Per la lavur sociala datti – sco per autras disciplinas – standards professiunals, tenor ils quals la lavur duai vegnir concepida. Nus ans occupain da quests standards ed als integrain sco directivas liantas en nossa lavur. Per exempel ans orientain nus a l'incumbensa, integrain las persunas pertutgadas per schliar ils problems, evaluain consequentamain nossa lavur ord differentas perspectivas, observain l'obligaziun da discreziun e lavurain en moda transparenta e chapaivla.

Collavuraziun

Sco organisaziun essan nus colliads en ina rait. Per sviluppar soluziuns collavurain nus cun differentas partenarias e cun differents partenaris.

Situaziuns socialas èn cumplexas. Quai signifitga p.ex. che situaziuns socialas problematicas e d'urgenza cumpiglian per regla pliras persunas participadas e pliras persunas pertutgadas. Savens èn involvidas autoritads, organisaziuns d'agid, autras persunas spezialisadas, uffizis e.u.v. In problem resulta or da la cumbinaziun d'in entir sistem. Uschia èsi er necessari che tut ils partenaris impurtants sa participeschian per chattar soluziuns. La creaziun da partenadis specifics augmenta nossas schanzas da dumagnar cun success situaziuns criticas e da sviluppar soluziuns adattadas.

Collavuraturas e collavuraturs

La qualitad da nossas prestaziuns da servetsch è determinada da l'engaschament e da la cumpetenza da nossas collavuraturas e da noss collavuraturs. Nus pretendain bler dad ellas e dad els e promovain pervia da quai ellas ed els en lur svilup professiunal.

Sche e quant enavant che nossas purschidas fan effect, dependa per gronda part da las relaziuns da confidenza tranter las persunas pertutgadas e nossas collavuraturas e noss collavuraturs. Da la relaziun directa resulta ina plivalur da nossa lavur. Nossas collavuraturas e noss collavuraturs na ston betg mo agir professiunalmain, ellas ed els ston er pudair ademplir pretensiuns relaziunalas. Latiers tutgan l'engaschament en il cas singul, l'occupaziun cun differentas aspectativas, l'abilitad da schliar conflicts, l'empatia, la directadad e l'abilitad da sa distanziar. Areguard questas pretensiuns promovain nus nossas collavuraturas e noss collavuraturs.

Organisaziun e meds

Nus essan in'organisaziun innovativa. Nus impundain ils meds en moda efficazia e conscienziusa.

L'administraziun chantunala porscha il rom, en il qual nus essan activs. Nus na resguardain «administraziun» ed «innovaziun» betg sco chaussas cuntradictoricas. Noss potenzials d'innovaziun tirain nus a niz en moda engaschada. Cun la finamira da deliberar forzas per l'incumbensa principala duvrain nus furmas organisatoricas modernas. Latiers tutga er l'utilisaziun d'ina infrastructura moderna. En vista al basegn d'infurmaziun e da savida en questa organisaziun gioga er l'informatica ina rolla impurtanta.

L'uffizi dal servetsch social impunda ils meds finanzials cun cleras intenziuns e cun quità.

Regiuns e center

Nus resguardain particularitads regiunalas. Nus vesain e tirain a niz la schanza da l'organisaziun centralisada dals fatgs socials dal Grischun.

Cuntrari ad auters chantuns vegnan las incumbensas socialas en il chantun Grischun ademplidas en moda centralisada (dal chantun). Cun ils servetschs socials regiunals resguarda el las particularitads da las singulas regiuns e permetta la realisaziun da standards professiunals malgrà premissas economicas, culturalas, socialas e linguisticas fitg differentas. En moda centralisada na vul betg dir ignorar particularitads regiunalas. Gist en il champ da tensiun tranter ils dus pols center e regiun vesain nus las schanzas da svilup per il post da servetsch e per la concepziun da las incumbensas.

Publicitad

La populaziun enconuscha nossas purschidas en la cussegliaziun sociala ed en l'accumpagnament d'umans. Persunas pertutgadas e persunas interessadas han in access simpel a nossas purschidas e fan diever da quellas.

Ils umans ston enconuscher las purschidas da l'uffizi dal servetsch social per ans cuntanscher facilmain. Sulettamain quai als permetta da far diever da quests servetschs baud avunda – vul dir a temp. Per quest motiv communitgain nus nossas purschidas regularmain en la publicitad ed ad ina gronda part da la populaziun. Dentant betg mo il grad d'enconuschientscha è decisiv, mabain er l'access facil e nunbirocratic a nossas purschidas.