Las picturas muralas dal temp medieval tempriv en il Grischun èn ina perditga rara da la ritgezza culturala. Ellas dattan ina invista da las tecnicas da picturar, da la creaziun da pigments e d'influenzas culturalas. La perscrutaziun transdisciplinara revelescha las raits davos las ovras d'art.

Il project, che vegn manà d'in team da scienziadas e scienziads da la natira, d'archeologas ed archeologs sco er d'istoricras ed istorichers d'art, sa deditgescha a la perscrutaziun transdisciplinara da las picturas muralas dal temp medieval tempriv da la Raetia Curiensis. Questas ovras d'art na dattan betg mo ina invista da la bellezza estetica da temps passads, mabain èn er ina fanestra vers las raits socialas, culturalas e tecnologicas cumplexas da lur temp d'origin.

Grazia a l'applicaziun da las pli modernas metodas scientificas d'analisa vegn reconstruì l'entir process da producziun da questas picturas muralas. Davent da l'acquisiziun e da la creaziun dals pigments fin a l'applicaziun da differentas tecnicas da picturar – mintga detagl vegn analisà minuziusamain. Questas retschertgas vegnan cumplettadas cun enconuschientschas archeologicas e da l'istorgia d'art, per pussibilitar in'analisa cumplessiva e cumparativa.

La finamira da questa perscrutaziun n'èsi betg mo da chapir ils aspects tecnics da la producziun d'art, mabain er ils contexts socials e culturals che han laschà nascher questas ovras d'art. En quest connex na vai betg mo per interpretar singuls objects, mabain plitgunsch per eruir la derasaziun da las tecnicas, da la savida e da las ideas durant il temp tranter il 6avel ed il 10avel tschientaner.

Las enconuschientschas fatgas han il potenzial d'approfundar nossa chapientscha da questa perioda impurtanta da l'istorgia europeica e da porscher novas invistas da la dinamica e da la diversitad da las societads da quella giada. Cun cumbinar las scienzas natiralas, l'archeologia e l'istorgia d'art gida quest project a mantegnair ils stgazis culturals d'epocas passadas e d'als render accessibels ad in public pli vast.

Contacts

Patrick Cassitti
Giovanni Cavallo
Thomas Reitmaier

Litteratura

Cavallo, G., Aceto, M., Emmenegger, R. et al. Preliminary non-invasive study of Carolingian pigments in the churches of St. John at Müstair and St. Benedict at Malles. Archaeol Anthropol Sci 12, 73 (2020). Link zum Artikel.

Link

Forgotten colors - Rediscovering the original polychromy of early medieval wall paintings in the Raetia Curiensis region