En il rom d'ina surbajegiada planisada fa il Servetsch archeologic dal Grischun dapi il schaner 2022 in'exchavaziun d'urgenza en il Schlossbungert sin la prada Vial a Zizers. En quest connex ha el scuvrì in champ da fossas e restanzas d'in abitadi che dateschan dal temp roman tardiv e probablamain anc dal temp medieval tempriv. La colonisaziun romana a Zizers – ch'era cumprovada fin ussa mo a maun da chats singuls – po vegnir reproducida per l'emprima giada pli detagliadamain.

L'uschenumnà Unteres Schloss – cun il Schlossbungert, il curtin da pumera appartegnent – è situà en il center istoric da la vischnanca da Zizers. Sin in spazi stretg sa chattan qua differents lieus da chats archeologics d'impurtanza surregiunala. Extraordinaria è la curt roiala carolingic-ottonica ch'è vegnida construida durant il 8. tschientaner. Sias restanzas èn situadas directamain al nord dal Schlossbungert. Betg lunsch davent al vest dal chastè stat la ruina medievala Friedau. Qua han ins plinavant chattà l'onn 2002 restanzas d'in abitadi dal temp neolitic enturn l'onn 4800 a.C. Talas dattan perditga da l'emprima cultivaziun dad ers e da l'allevament tempriv da muvel en la Val dal Rain.

Exchavaziun en il Schlossbungert
Il Schlossbungert serviva pli baud a la pumicultura. En il rom da la surbajegiada planisada ha il Servetsch archeologic fatg gia il matg 2021 prospecziuns geofisicalas ed archeologicas. En la part nord da quest areal ch'è marcà da bovas han ins chattà en quest connex restanzas d'in abitadi, ma er restanzas da fossas. En enclegientscha cun las persunas responsablas per la construcziun da la surbajegiada è perquai vegnida planisada ina vasta exchavaziun. Quella vegn realisada dapi il cumenzament da quest onn avant la lantschada da las lavurs da construcziun effectivas da la surbajegiada. Ils chats archeologics dateschan principalmain dal temp roman tardiv (ca. 250 fin 450 s.C.) e probablamain anc dal temp medieval tempriv.

Champ da fossas da l'antica tardiva e fastizs d'in vegl artisanadi
Fin ussa ha il Servetsch archeologic pudì scuvrir sis fossas che cuntegnevan per part numerusas agiuntas – tranter auter in bitger da scalegl, ina fivla celtica, in cuntè da fier sco er vivonda (cumprovada en furma d'ossa d'animals). Perquai che quest territori è vegnì duvrà pli tard per la cultivaziun dad ers, èn las sis baras per part donnegiadas resp. betg mantegnidas cumplettamain.

En la proxima vischinanza dal champ da fossas han ins chattà restanzas d'in abitadi cun indizis per activitads artisanalas. Ils chats cumpiglian duas chasas chavadas en foss. Ina da quellas era vegnida construida senza maulta ed aveva almain dus fuclars. Ultra da quai han ins chattà in indriz per stgaudar, ulteriurs fuclars u fuainas, foras per pitgas sco er deponias da rument. La relaziun temporala exacta tranter quests chats ed il champ da fossas n'è betg anc sclerida.

Fotografias agiuntadas:

Bild 2 | Bild 3 | Bild 4 | Bild 5

Infurmaziuns:

• Dr. Thomas Reitmaier, archeolog chantunal, Servetsch archeologic dal Grischun, tel. +41 81 257 48 60, tel. +41 76 470 19 46, e‑mail Thomas.Reitmaier@adg.gr.ch
• Christoph Walser, manader dal sectur Perscrutaziun d'edifizis / dal terren, Servetsch archeologic dal Grischun, tel. +41 81 257 48 60, e‑mail Christoph.Walser@adg.gr.ch
• Raphael Sele, manader da las exchavaziuns Zizers Schlossbungert, Servetsch archeologic dal Grischun, tel. +41 81 257 48 84, tel. +41 78 912 11 45, e‑mail Raphael.Sele@adg.gr.ch

Responsabladad: Uffizi da cultura / Servetsch archeologic dal Grischun