Tar mintga retschertga archeologica vegn producì in grond dumber da documents e da datas analogas e digitalas. En il diari d'exchavaziun vegnan descrittas detagliadamain las structuras ch'èn vegnidas scuvertas sco er las observaziuns e las interpretaziuns respectivas. Fotografias digitalas documenteschan da differents puntgs da vista e da differentas autezzas ils resultats ed ils chats exchavads. Sin plans e sin dissegns vegnan registrads orizontalmain (planum) e verticalmain (profil) mirs, fossas ed auters resultats tenor ina scala exacta. Per ch'ins possia per exempel declerar il diever e l'organisaziun dals areals d'in abitadi preistoric e dals singuls locals en edifizis, vegn il lieu, nua ch'ils objects èn vegnids chattads, mesirà en moda traidimensiunala ed inscrit en las glistas dals chats. Tut questas infurmaziuns servan sco substituziun per il monument dal terren ch'è per regla destruì e sco basa per l'evaluaziun scientifica posteriura.

Cur che tut questas infurmaziuns da basa èn avant maun, pon vegnir reconstruidas la naschientscha e l'istorgia d'in abitadi dal temp da bronz, d'in santeri dal temp da fier u d'in cumplex da tur dal temp medieval. Ma las analisas archeologicas d'ina plazza d'exchavaziun èn terminadas per propi ed èn archivadas definitivamain pir, cur ch'ils resultats da l'evaluaziun stattan a disposiziun en ina furma stampada ad ina vasta publicitad.