La dendrocronologia (dendron: bostg, planta; chronos: temp, logos: scienza), er numnada dataziun dals rintgs annuals, s'occupa da la determinaziun da la vegliadetgna dal lain en las disciplinas da las scienzas geologicas (climatologia, ecologia) e da las scienzas umanas (archeologia, perscrutaziun architectonica, istorgia d'art). La successiun dals rintgs annuals stretgs e lartgs d'in bostg mussa en emprima lingia las differentas influenzas meteorologicas e climaticas durant ch'el crescha. Entaifer la medema zona geografica han ils bostgs da la medema sort da lain, ch'èn creschids a medem temp, per il solit rintgs annuals congruents u fitg sumegliants. Sch'ina prova da lain ha almain 50 rintgs annuals, sch'ils rintgs annuals èn creschids senza disturbis e sche la curva è statisticamain ed opticamain fitg sumeglianta a las curvas da referenza da la medema sort da lain da la medem regiun, po la vegliadetgna dal bostg vegnir datada exactamain sin l'onn. Sche l'ultim rintg annual ch'è creschì sut la scorsa (ur dal bostg, visibel vi da la furma originala dal bist) è avant maun, pon ins determinar l'onn e la stagiun ch'il bostg è vegnì terrà. Uschia èsi pussaivel d'eruir exactamain l'istorgia architectonica d'edifizis istorics e l'onn da producziun d'objects archeologics.


Il Labor dendrocronologic dal Servetsch archeologic è vegnì fundà l'onn 1997 ed elavura en emprima lingia projects interns. En il rom da renovaziuns d'edifizis ed en il rom da scleriments per metter sut protecziun edifizis, surpiglia il Labor er incumbensas da dataziun per la Tgira da monuments dal Grischun.

Da quest servetsch pon profitar er persunas privatas che vulan laschar constatar, cunter pajament, la vegliadetgna da lur chasa d'abitar grischuna u d'in object da lain d'origin grischun.

As interessais Vus per in'analisa dendrocronologica ed avais Vus dumondas generalas davart il proceder e la metoda?

FAQ per incumbensas privatas

 

Il Labor dendrocronologic dal Servetsch archeologic dal Grischun sustegna la Convenziun da la UNESCO da l'onn 1972, che prescriva tranter auter da publitgar la derivanza e las relaziuns da possess da bains culturals mobils, ed el observa er ils standards scientifics e metodics da la dendrocronologia.