Mo cun declerar e cun mussar adina puspè a grond ed a pitschen noss resultats e noss chats pudain nus render conscienta la publicitad davart noss patrimoni archeologic e svegliar en ella mirveglias da'l scuvrir. A chaschun da visitas guidadas e da referats che vegnan annunziads en la pressa quotidiana, vegnan preschentadas detagliadamain singulas plazzas d'exchavaziun. Tar exchavaziuns e tar analisas d'edifizis che duran pli ditg, po la populaziun persequitar directamain las lavurs a chaschun dal di da las portas avertas.

Per che spezialistas e spezialists dentant er laicas e laics interessads e la publicitad possian leger ils resultats scientifics da las differentas intervenziuns archeologicas, publitgeschan las collavuraturas ed ils collavuraturs dal servetsch archeologic dal Grischun regularmain en revistas specificas naziunalas ed internaziunalas. Dapi l'onn 2013 stat ultra da quai a disposiziun sco nov organ da publicaziun en spezial la nova retscha Archäologie Graubünden, nua ch'i vegn rapportà regularmain davart exchavaziuns da salvament sco er davart projects scientifics da perscrutaziun che vegnan fatgs en moda detagliada sin territori chantunal. Grazia a carnets spezials, a differents fegls sgulants d'infurmaziun ed a la lavur da medias vegn la publicitad infurmada davart las scuvertas archeologicas e davart il patrimoni cultural en il terren grischun. 

Als Dis europeics dal monument (hereinspaziert.ch Denkmaltage) è il servetsch archeologic mintgamai l'atun – ensemen cun la tgira da monuments dal Grischun e cun la Protecziun da la patria dal Grischun giast en ina tscherta regiun dal Grischun, nua ch'el preschenta in program attractiv.