Tge èn atgnamain chats archeologics?
Chats archeologics èn perditgas materialas da culturas passadas. Il pli savens vegnan chattads vaschs entirs u fragments da vaschs or da cheramica, objects ed urdains da vaider, crap, lain, ossa, cornas e metal. Els cuvran in spectrum da temp che cumpiglia tut las epocas e che tanscha enavos fin lunsch en ils temps preistorics. Perquai che tals chats èn savens fragments u objects incrustads u corrodads, n'èsi betg adina facil d'identifitgar immediatamain e senza dubi in chat archeologic sco tal.

Tge stoss jau far, sche jau chat in object che pudess esser interessant per l'archeologia?
Objects archeologics che vegnan chattads sin u en il terren grischun, appartegnan al chantun Grischun (art. 724 CCS). Tegnai endament il lieu da chat ed annunziai Vossa scuverta al servetsch archeologic! Sche pussaivel duain chats restar senza midadas al lieu da chat, per che la situaziun e las circumstanzas dal chat possian vegnir retschertgadas.
Annunzia da chats: info@adg.gr.ch

Dastg jau chavar sin atgna iniziativa per tschertgar antiquitads?
Na! La tschertga d'antiquitads cun detecturs da metal u cun auters meds auxiliars, ma er atgnas exchavaziuns per chattar objects archeologics èn scumandadas, er sin terren privat. Objects chattads a la surfatscha ston vegnir annunziads tenor la lescha davart la protecziun da la natira e da la patria.
Annunzia da chats: info@adg.gr.ch

Vegnan projects da construcziun retardads tras «ils archeologs…»?
Sondagis archeologics u exchavaziuns d'urgenza en connex cun in project da construcziun vegnan fatgs tant sco pussaivel gia (ditg) avant il cumenzament da las lavurs da construcziun. La premissa per quai è per regla l'existenza d'ina permissiun da construcziun valaivla. Sch'ina exchavaziun è indispensabla, vegnan tschertgadas soluziuns ensemen cun ils patruns da construcziun, per ch'eventuals retardaments possian vegnir minimads u evitads. En cas singuls na sa lascha in retardament dentant effectivamain betg evitar, per exempel sche structuras territorialmain vastas ch'eran fin qua nunenconuschentas e/u sch'in grond dumber d'objects vegn a la glisch. Sco ch'il num implitgescha dentant: il servetsch a favur da la populaziun ha emprima prioritad.