Decleraziun davart la protecziun da datas

Questa decleraziun davart la protecziun da datas inditgescha:

• Tge datas che vegnan rimnadas.
• Danunder che las datas derivan.
• Per tge intent ch'ellas vegnan rimnadas.
• Quant ditg ch'ellas vegnan arcunadas.
• Tgi che ha access a las datas.
• Sche las datas vegnan dadas vinavant a terzas persunas, e sche gea, en tge dimensiun.
• Tgi ch'è la persuna da contact en cas da giavischs en connex cun las datas.
  

Nus registrain ed arcunain datas persunalas (num, prenum, data da naschientscha, adressa, NP, lieu, e-mail, telefon) che nus eruin directamain da las persunas che utiliseschan la biblioteca e ses servetschs. Las datas vegnan elavuradas exclusivamain per ademplir il servetsch dumandà e per observar noss agens interess da fatschenta legitims. Las datas servan per garantir l'administraziun da l'emprest, da la restituziun e da l'admoniziun da medias. L'account da biblioteca persunal permetta l'identificaziun – via la carta da biblioteca – e vegn duvrà per liquidar ils servetschs da biblioteca, sco emprest autonom, empustaziuns, giavischs d'acquisiziun ed utilisaziun da purschidas electronicas.

Questas indicaziuns vegnan arcunadas durant l'entir temp da l'utilisaziun da la biblioteca. 3 onns suenter la scadenza da l'abunament da biblioteca vegn l'account cun las datas persunalas stizzà. Sch'in abunament da biblioteca na vegn betg prolungà, pon ins pretender che l'account vegnia stizzà immediatamain.

Per evaluaziuns statisticas vegnan duvradas mo datas anonimisadas che na permettan betg da prender regress sin datas persunalas.

Las dumondas sur il formular da contact da nossa pagina d'internet na vegnan betg arcunadas là, mabain tramessas vinavant sco e-mail. Quest e-mail vegn tegnì en salv mo uschè ditg ch'el vegn duvrà per respunder la dumonda. Questas datas èn accessiblas exclusivamain al persunal da la biblioteca en il rom da sia funcziun.

Nus avain prendì mesiras tecnicas ed organisatoricas che garanteschan, che las prescripziuns dal dretg davart la protecziun da datas vegnian observadas tant da nus sco er dals furniturs externs da servetschs che nus avain incumbensà, particularmain ils gestiunaris dal sistem da biblioteca Ex Libris (incumbensà per la protecziun da datas dpo@exlibrisgroup.com). A nossas collavuraturas ed a noss collavuraturs sco er a las interpresas da servetsch che nus avain incumbensà, avain nus obligà d'observar las disposiziuns davart la protecziun da datas. Nus na dain vinavant naginas datas persunalas a terzas persunas.

Sch'ina annunzia supplementara è necessaria per utilisar medias electronicas en il sistem d'in furnitur da servetschs, vegn quella autentifitgada ubain cun dumandar las datas arcunadas en il sistem da biblioteca ubain cun las datas d'annunzia che l'utilisadra u l'utilisader ha cumponì sez. Per las datas ch'èn vegnidas cumponidas ordaifer il sistem da biblioteca e ch'èn necessarias per ils servetschs da biblioteca, valan las disposiziuns davart la protecziun da datas dal furnitur da servetschs respectiv. Process d'emprest e d'utilisaziun da medias electronicas vegnan arcunads en furma anonimisada sin ils sistems esters participads.
Ils cookies che vegnan duvrads da la pagina d'internet e dals terzs furniturs, èn menziunads detagliadamain en l'impressum.

Las datas persunalas arcunadas pon vegnir consultadas ed elavuradas da tut temp cun l'account da biblioteca persunal sin la pagina d'internet https://www.opac.gr.ch/.

Dumondas davart il tema «protecziun da datas» drizzai per plaschair per e-mail a datenschutz@gr.ch.

Open Bibliographical Data

Sch'ellas n'èn betg marcadas spezialmain, pon tut las metadatas ch'èn publitgadas da l'Uniun da bibliotecas dal Grischun (BGR) vegnir utilisadas libramain e suttamessas a la Creative Commons CC0 1.0 Universal Public Domain Dedication.

En cas da l'utilisaziun da nossas metadatas sto vegnir dictada ina disposiziun analoga.

Pretensiuns da responsabladad envers la BGR e sias commembras e ses commembers pervia da donns materials u immaterials ch'èn resultads tras l'access u tras l'utilisaziun da las datas publitgadas, tras l'abus da la colliaziun u tras disturbis tecnics, vegnan exclusas.