Qua chattais Vus tuttas infurmaziuns pertutgant procedura ed annunzia per l’examen d’admissiun en ina scola media chantunala.  

Ma pos jau s’annunziar pliras giadas?

Suenter la registraziun pudais Vus s’annunziar tontas giadas sco Vus vulais cun Vossa adressa dad e-mail ed il pled-clav entaifer il temp d’annunzia fin a l’annunzia definitiva e modifitgar Vossa annunzia.

Tge pos jau far, sche jau n’hai betg access a l’internet?

En quai cas pudais Vus fixar in termin per l’annunzia electronica cun ils secretariats da las scolas medias ni da l’Uffizi per la furmaziun media-superiura.

Co stoss jau agir tar l’annunzia da plirs candidats?

Tar l’annunzia da plirs candidats sto per mintga singula annunzia vegnir drizzada en ina nova entrada cun Vossa adressa dad e-mail ed in pled-clav separà. In pled-clav gia utilisà na sa betg vegnir duvrà per ina ulteriura annunzia. 

Co sai jau sche l’annunzia ha funcziunà?

Suenter avair tramess l’annunzia definitivamain vegnis Vus a survegnir in e-Mail che confirma Vossa annunzia. Davent da quel temp pudais Vus be controllar Vossas datas, ma betg pli midar quellas. Sche Vus vulais far midadas suenter l‘annunzia definitiva, prendai per plaschair si contact cun l‘Uffizi per la furmaziun media-superiura (support@zap.gr.ch). 

Stos jau absolver l’examen en la medema scola media che jau vi frequentar pli tard?

Na, Vus pudais tscherner tar l’annunzia il lieu d’examen independentamain da la scola media che vegn frequentada pli tard. La libra tscherna da la scola è garantida.

Pos jau m’annunziar per l’entrada en la 3. classa dal gimnasi ed alternativ per l’entrada en la 1. classa da la SMC, SMI ni SMS?

Gea, Vus pudais inditgar tar l’annunzia tge tip da scola ed il lieu da scola che Vus vulais tscherner per cas che Vus n’avais betg dumagnà l’access a la 3. classa dal gimnasi sin fundament dals resultats da l’examen, ma Vus fissas dentant admess a la 1. classa da la SMC, SMI ni da la SMS.

Mutaziuns che pertutgan la scola media e partiziun tschernida èn pussaivlas tar l’Uffizi per la furmaziun media-superiura fin a 5 dis suenter avair retschavì la decisiun da l’examen.

Stoss jau anc inoltrar ulteriurs documents suenter l’annunzia electronica?

Gea, ils documents ston vegnir inoltrads tar l’Uffizi per la furmaziun media-superiura, secretariat d’examens d‘admissiun, Grabenstrasse 1, 7001 Cuira u electronicamain a support@zap.gr.ch:

• copia da l‘attestat (copia da l’ attestat da l’emprim semester da l'onn current)
• copia da la carta d’identitad ni dal pass.

Sche Vus inoltrais ils documents electronicamain, na duvrain nus quels betg supplementarmain en format da palpiri. Il termin per inoltrar posteriuramain ils documents chattais Vus sut www.zap.gr.ch.

Survegn jau ina confirmaziun cura che jau hai inoltrà ils documents che jau hai tramess pli tard?

Na. I na vegn betg tramess retschavidas (era betg sin dumonda). En cas dad irregularitads vegn l’Uffizi per la furmaziun media-superiura a prender si contact cun Vus per telefon.

Stoss jau trametter ils documents che jau tramet pli tard scrit en?

Na. Quai n’è betg necessari. Ils documents pon vegnir inoltrads cun posta ordinaria u electronicamain (ma na cun posta e electronicamain).

Fin cura stoi jau pajar la taxa d'examen da CHF 100.-?

Il termin da pajament munta a 30 dis suenter avair retschavì il cedel da pajament. L’inadempliment dal termin da pajament na maina betg a l’exclusiun da l’examen, chaschuna però il proceder d’incasso (admoniziun, scussiun, etc.).

Stoss jau era pajar la taxa d’examen sche jau visescha l’annunzia a l’examen d’admissiun u sche jau na fetsch betg l’examen?

Sche la retratga succeda avant la scadenza dal termin d’annunzia scroda la taxa d’examen. Suenter la scadenza dal termin d’annunzia sto la taxa d’examen vegnir pajada en mintga cas.  

Tge capita sche jau na poss betg vegnir als examens per motivs nunprevis?

Tgi che na po betg sa participar als examens per motivs da sanadad nunprevis u en consequenza d’in accident sto communitgar quai il pli spert pussaivel tant a la direcziun dal lieu d’examen sco era al secretariat d’examen, il pli tard dentant avant l’entschatta da l’examen agiuntond in attest dal medi.

La gruppa directiva examens d’admissiun a las scolas medias grischunas decida davart ina admissiun eventuala als examens supplementars. 

Poss jau far ils examens supplementars sche jau hai manchentà il termin d’annunzia?

Na. Access als examens supplementars ha mo tgi ch’è s’annunzià entaifer il termin per ils examens d’admissiun, n’ha dentant per motivs cumprovabels (attest dal medi) betg pudì sa participar als examens.

Poss jau m’annunziar sco scolara extrachantunala u scolar extrachantunal als examens d’admissiun chantunals?

Na. Als examens d’admissiun chantunals pon mo s’annunziar scolaras e scolars, dals quals ils geniturs (almain in genitur) èn domicilià en il chantun Grischun.

Tge proceder succeda per scolaras extrachantunalas e scolars extrachantunals?

Las singulas scolas medias grischunas pon acceptar scolaras extrachantunalas e scolars extrachantunals, che na vegnan betg anc d’in gimnasi, tenor atgnas fixaziuns confurmas a las leschas. En in tal cas ins survegn infurmaziuns tar la scola media giavischada.

Poss jau contestar la decisiun da l’examen, sche jau na sun betg perencletg?

Gea, tant enavant che vus n’avais tenor decisiun betg cuntanschì las premissas per l’admissiun en l’emprima classa gimnasiala (decisiun da l’examen negativa). Tar la decisiun negativa da l’examen sa tracti d’ina disposiziun cun indicaziun dals meds legals. Il termin per meds legals cumenza il di suenter la consegna da la decisiun (1. di) e finescha il dieschavel di. Croda la fin dal termin (10. di) sin ina dumengia u sin in firà uffizial, finescha il termin fixà il suandant lavurdi.