Has ti interess per divers roms, vas ti gugent a scola ed emprendas ti cun plaschair? Vulessas ti studegiar pli tard ad in'universitad u ad ina scol'auta? Lura è il gimnasi cun ina vasta furmaziun generala il dretg profil da scolaziun per tai.    

Has ti gugent contact cun auters carstgauns e vulessas ti lavurar u studegiar en ils champs pedagogia, sanadad u socialesser? Lura è la scola media spezialisada cun la pussaivladad da frequentar a moda consecutiva la maturitad dal rom il dretg profil da scolaziun per tai.     

T'interesseschas ti per temas che stattan en connex cun l'economia ed il dretg? Vulessas ti absolver ina scolaziun professiunala polivalenta che pussibilitescha a tai d'entschaiver a lavurar ubain da frequentar in studi cuntinuant? Lura è la scola media commerziala cun il diplom dubel da la maturitad professiunala e da l'attestat federal da qualificaziun il dretg profil da scolaziun per tai.    

T'interesseschas ti per l'informatica, vuls ti emprender a programmar ed a sviluppar applicaziuns? Vuls ti laschar avert, sche ti vuls entschaiver directamain a lavurar ubain frequentar in studi? Lura è la scola media d'informatica cun il diplom dubel da la maturitad professiunala e da l'attestat federal da qualificaziun il dretg profil da scolaziun per tai.    

• Dal Puschlav e l'Engiadina enfin la Surselva: A la Scola chantunala grischuna entaupas ti scolaras e scolars da l'entir chantun.
• Talian, rumantsch e tudestg: A la Scola chantunala grischuna vegn vivida la trilinguitad. Ultra da la pussaivladad da frequentar la matura bilingua vegns ti en contact cun scolaras e scolars che discurran sco emprima lingua in'autra lingua chantunala che ti.
• Discurrer currentamain duas linguas: A la Scola chantunala grischuna has ti la pussaivladad da frequentar la maturitad bilingua federala en las variantas italiano - tedesco, rumantsch - tudestg u tudestg - talian. Vitiers promovain nus l'englais: Ultra da la preparaziun per il certificat da linguas Advanced - la scola ha ina fitg auta quota da reussida - pos ti er frequentar divers roms d'accent e roms cumplementars en englais.
• Quatter profils da scolaziun: La Scola chantunala porscha tut ils quatters profils da scolaziun che vegnan purschids en il Grischun sin il livel gimnasial: il gimnasi, la SMS, la SMC e la SMI. Ina midada dal profil da scolaziun è pussaivla.
• Campus modern: La Scola chantunala grischuna è loscha dal campus spazius e modern. La digitalitad gioga ina rolla impurtanta sin il campus ed en l'instrucziun. In'alimentaziun varianta en la mensa e numerus plazs d'emprender e lavurar cun ina medioteca moderna cumpletteschan la purschida da la scola.
• Emprender spagnol, chantar en il chor u far trenament da forza: Ultra da las lecziuns obligatoricas ha la Scola chantunala grischuna ina purschida multifara da roms facultativs: linguas, furmaziuns da musica, ateliers d'art, scienzas natiralas e diversas disciplinas da sport. Dapli infurmaziuns chattas ti qua.
• Programs da promoziun per giuvenilas e giuvenils cun talents: La Scola chantunala grischuna pussibilitescha a scolaras e scolars, che fan sport da prestaziun sin in aut nivel u che han talents musicals, da metter sut tetg scola e sport/musica. Infurmaziuns davart il concept da sport da prestaziun – scola chattas ti qua, il concept da musica è en elavuraziun.
• Sustegn sin la via da daventar creschida resp. creschì: La scolasta resp. il scolast da classa e la persuna responsabla da la direcziun per la classa èn las emprimas persunas da contact. Sche tias finamiras n'èn betg anc propi cleras u sche ti passentas ina fasa in pau pli difficila, ta sustegnain nus cun las suandantas purschidas: cussegliaziun da studis e carriera, cussegliaziun d'emprender ed il Care Team intern.
• Scola distinguida: La Scola chantunala grischuna è certifitgada sco scola activa en il sectur MINT. Ella dispona d'in management da qualitad renconuschì cun ina evaluaziun externa dal zem ces. Ultra da quai prepara ella cun success scolaras e scolars per examens da certificat da linguas.

A chaschun da las occurrenzas d'infurmaziun publicas preschentain nus la scolaziun a la Scola chantunala grischuna e dain in'invista en la scola e sia infrastructura cun ina guida. Vitiers datti la pussaivladad da visitar la chasa da dimora Convict suenter l'occurrenza. Las occurrenzas d'infurmaziun publicas han lieu sco suonda:      

La cundiziun per vegnir admess a la Scola chantunala grischuna è in examen d'admissiun reussì. Infurmaziuns en quest connex èn da chattar sin la pagina-web da l'Uffizi per la furmaziun media-superiura:  Examens d’admissiun
Scolaras e scolars che vulan midar d'ina scola equivalenta a la Scola chantunala grischuna pervia d'ina midada da dimora da la famiglia, sa drizzan a la prorectura Christina Meier        

Konvikt - Standort Konvikt                      

• Custs

• Plan da vacanzas

Il plan da vacanzas dals proxims onns da scola per planisar tias vacanzas è da chattar qua.  

• Stipendis

Il formular per dumondas da stipendis ed ulteriuras infurmaziuns en connex cun ils stipendis èn da chattar qua. 

• Assicuranzas

L'assicuranza d'accidents da las scolaras e dals scolars è chaussa privata.