Las linguas naziunalas che n'èn betg menziunadas sco roms obligatorics ston tenor la tavla da lecziuns da la scola populara
dal Grischun a partir da l'onn da scola 2018/19 vegnir purschidas sco roms d'elecziun «3. lingua estra sco lingua naziunala», independentamain dal dumber da participantas e participants. Parts da quest rom d'elecziun pon vegnir absolvidas da las scolaras e dals scolars sco emnas cumpactas en las regiuns linguisticas.
Il chantun paja ina pauschala supplementara da 500 francs per scolara e scolar e per emna cumpacta. Per pudair metter a quint in'emna cumpacta ston almain vegnir visitadas 20 lecziuns davart l'emprender linguas. L'organisaziun da las emnas cumpactas è l'incumbensa dals purtaders da scola.
► La purschida vala sulettamain per il stgalim secundar I, rom d'elecziun 3. lingua estra sco lingua naziunala.
Duas variantas da las emnas cumpactas
- Emnas cumpactas d'ina classa en il territori linguistic (cun l'atgna persuna d'instrucziun spezialisada).
Per curs intensivs che vegnan organisads da la persuna d'instrucziun da classa (persuna d'instrucziun linguistica) sco emnas cumpactas en il temp da vacanzas sto il program vegnir approvà da l'inspecturat districtual.
- Emnas cumpactas sco curs intensivs a scolas ed instituts (classas u singuls scolars).
D'ina vart vegnan purschids moduls a scolas u instituts ch'involveschan en l'instrucziun ina persuna d'instrucziun ord la regiun linguistica. Per las ulteriuras activitads vegn invulvida la persuna d'instrucziun accumpagnanta. Da l'autra vart porschan scolas durant las vacanzas curs che pon vegnir visitads da singuls u da gruppas senza accumpagnament.
L'inspecturat examinescha periodicamain in'elecziun da scolas u instituts davart ils criteris da qualitad definids. En general èn las scolaras ed ils scolars alloschads en l'internat da la scola.