Ils champs chantunals da giuvenils èn fitg appreziads, perquai ch'els èn fitg favuraivels grazia a subvenziuns federalas e chantunalas e perquai ch'els vegnan manads en moda cumpetenta da persunas flexiblas ed innovativas che han fatg la scolaziun da Giuventetgna+Sport (G+S).

Ils champs da sport vegnan purschids dals uffizis da sport dals chantuns Appenzell Dador, Appenzell Dadens, Glaruna, Grischun, Schaffusa, Son Gagl, Turgovia, Turitg e dal Principadi dal Liechtenstein. En noss champs da sport stat la scolaziun sportiva en il center. Per che tuts possian far progress, vegnan mintgamai furmadas gruppas cun giuvenils pli u main tuttina ferms. Ultra dal punct central sport sa stentan nossas manadras e noss manaders da G+S er da concepir in program accumpagnant varià, uschia ch'in champ plain aventuras resta adina en buna memoria.

Da las participantas e dals participants vegni spetgà ch'ellas ed els s'adatteschian a la vita da champ e da gruppa ed observian en spezial las reglas dal champ, sajan prontas e pronts d'absolver plain motivaziun il program da sport e surpiglian en moda conscienziusa lavurs pli pitschnas.

A l'annunzia ed ad ulteriuras infurmaziuns davart ils champs da sport da giuventetgna arrivais Vus qua.