La constituziun federala dat il dretg als chantuns da far contracts cun l'exteriur sin ils champs da cumpetenza ch'als pertutgan e d'avair contact direct cun autoritads estras subordinadas. En quest connex discurran ins da l'uschenumnada "pitschna politica exteriura" dals chantuns.

Il chantun Grischun sco chantun da cunfin tgira er relaziuns suror ils cunfins naziunals. Problems transcunfinals duain vegnir schliads en il rom da structuras transcunfinalas. Perquai tgira il Grischun ina stretga collavuraziun cun las regiuns da l'exteriur vischin.

Collavuraziun cun la regiun Lumbardia

Per exempel ha il chantun Grischun suttascrit ina decleraziun d'intenziun davart la cooperaziun transcunfinala cun la regiun vischina Lumbardia. En il center da las stentas stattan ils secturs economia, sanadad e traffic. Questa decleraziun duai meglierar las relaziuns commerzialas e promover projects da sanadad cun l'intent da meglierar il provediment general da la sanadad ed il servetsch da salvament en la regiun da cunfin communabla. Grazia a la collavuraziun pli stretga duai er vegnir meglierada la purschida dal traffic public transcunfinal.

Collavuraziun cun la provinza Bulsaun-Tirol dal sid

In ulteriur exempel per ina collavuraziun transcunfinala curunada da success è la cunvegna cun la provinza autonoma Bulsaun-Tirol dal sid davart l'organisaziun dal salvament transcunfinal cun helicopters. Objects da la cunvegna èn la coordinaziun da las acziuns da salvament en cas d'accidents u d'autras situaziuns d'urgenza en la regiun da cunfin, l'ospitalisaziun tenor acziuns primaras, la collavuraziun tranter las equipas dals helicopters esters e las organisaziuns da salvament localas, la surpigliada dals custs sco er il barat d'infurmaziuns tranter las autoritads dals servetschs da salvament participads.