La conferenza metropolitana da Turitg è vegnida fundada l'onn 2009. Ella:

• s'engascha per ina collavuraziun pli stretga e per in entretschament pli grond tranter ils chantuns, las citads e las vischnancas dal spazi metropolitan da Turitg
• porscha ina plattafurma per il barat d'infurmaziuns tranter ils chantuns e las vischnancas
• realisescha projects sin ils champs d'acziun spazi da viver, traffic, societad ed economia
• s'engascha sin plaun federal per ils interess dal spazi metropolitan da Turitg

Finamira

La finamira è quella da promover la qualitad da viver sco er da rinforzar il spazi metropolitan da Turitg sco lieu economic naziunalmain ed internaziunalmain excellent

Instituziun responsabla e commembers

L'uniun spazi metropolitan da Turitg è l'instituziun responsabla da la conferenza metropolitana da Turitg. La conferenza metropolitana da Turitg cumpiglia ils chantuns Argovia, Turgovia, Schaffusa, Sviz, Son Gagl, Zug, Turitg e Lucerna sco er 120 citads e vischnancas dal spazi metropolitan da Turitg. Commembers associads èn tranter auter ils chantuns Grischun e Glaruna.

Organisaziun

La conferenza metropolitana è la radunanza da commembers e l'organ suprem da l'uniun. La radunanza da commembers ha lieu duas giadas per onn e sa cumpona da represchentantas e represchentants dals otg chantuns commembers e da las citads e vischnancas. La direcziun strategica ha il cussegl metropolitan che sa cumpona da mintgamai otg represchentantas e represchentants da la chombra dals chantuns sco er da la chombra da las citads e vischnancas.