Tar la Chanzlia chantunala dal Grischun pon vegnir autentifitgads documents ch'èn vegnids suttascrits d'autoritads e d'uffizis grischuns, sco per exempel dretgiras, autoritads communalas, uffizis da stadi civil, l'Uffizi dal register da commerzi, ubain da notaras e notars. En la correspundenza giuridica internaziunala numnan ins ina tala autentificaziun er legalisaziun.

Cun la legalisaziun conferma la Chanzlia chantunala sulettamain l'autenticitad da la suttascripziun da la funcziunaria u dal funcziunari da documentaziun, però betg la correctadad dal cuntegn dal document.

Directamain na po la Chanzlia chantunala betg legalisar suttascripziuns da persunas privatas. Per quest intent As drizzai per plaschair ad in notariat, a l'Uffizi dal register funsil u a la vischnanca.

Apostilla

Per ils stadis ch'èn participads a la "Convenziun da Den Haag" vegn la legalisaziun fatga cun in'apostilla. Ils documents vegnan deliberads d'ina legalisaziun dal consulat e vegnan renconuschids directamain en il pajais da destinaziun.

Per stadis libers che n'èn betg represchentads en la "Convenziun da Den Haag", vala la legalisaziun normala senza apostilla. Ma silsuenter è necessaria ina legalisaziun surordinada dal consulat. Sche Voss pajais ha suttascrit la "Convenziun da Den Haag", vesais Vus sin la glista d'apostillas.

Custs per autentificaziuns (legalisaziuns / apostillas)

Las autentificaziuns vegnan pajadas cun quint, en daner blut u cun carta tenor l'Ordinaziun da taxas.

Termins d'elavuraziun

La legalisaziun vegn fatga durant las uras d'avertura (gli fin ve 10.00 – 11.00 / 14.00 – 16.00), per regla immediatamain e senza preannunzia. Incumbensas da passa 10 documents pretendan in pau dapli temp d'elavuraziun. Ils documents pon vegnir tramess per posta u vegnir retratgs tar la Chanzlia chantunala tenor cunvegna. En cas da legalisaziuns per posta agiuntai per plaschair adina ina brev accumpagnanta, en la quala è inditgà cleramain il pajais da destinaziun dal document che sto vegnir legalisà resp. l'adressa exacta per la respediziun dal document legalisà e dal quint.

Adressa ed uras d'avertura

Chanzlia chantunala
Legalisaziuns
Reichsgasse 35, chascha postala, 7001 Cuira
Biro 05, plaunterren

Uras d'avertura: glindesdi fin venderdi: 10.00 – 11.00 e 14.00 – 16.00
Telefon: +41 (0)81 257 22 23
Telefax: +41 (0)81 257 21 41
E-mail: info@gr.ch