En connex cun la realisaziun da la nova concepziun da la gulivaziun da finanzas e da la repartiziun da las incumbensas tranter la confederaziun ed il chantun (NGF) è la cumpetenza per finanziar las instituziuns per persunas cun impediments passada als chantuns. Ils chantuns han numnadamain survegnì l'incumbensa da pajar las prestaziuns da la AI d'enfin ussa durant il temp transitoric da 2008 fin 2010. Pir cur ch'in concept chantunal per persunas cun impediments vegn approvà dal cussegl federal, pon ils chantuns sa liberar da questa obligaziun.
Effectivamain èsi dentant uschia che differentas instituziuns che tgiran persunas creschidas cun impediments han stuì reducir lur persunal durant quest temp transitoric, perquai che la finanziaziun tras il chantun na permetteva betg insatge auter. Plinavant n'han las instituziuns che tgiran persunas creschidas cun impediments fin oz betg cunvegnas da prestaziun per l'onn 2010.
Las sutsegnadras ed ils sutsegnaders supplitgeschan perquai la regenza da respunder las suandantas dumondas:
1. Per tge instituziuns èn vegnidas furnidas prestaziuns pli bassas che avant la NGF?
2. Co èsi da sa declerar che tschertas instituziuns han stuì reducir rigurusamain lur persunal cur ch'igl è vegnì midà a la nova NGF?
3. Pertge n'han las instituziuns fin oz (atun 2010) anc nagina cunvegna da prestaziun per l'onn 2010?
Cuira, ils 19 d'october 2010
Hitz-Rusch, Bondolfi, Lorez-Meuli, Barandun, Baselgia-Brunner, Brandenburger, Bucher-Brini, Candinas, Casanova-Maron, Casty, Casutt, Clalüna, Claus, Darms-Landolt, Della Vedova, Dosch, Engler, Fallet, Felix, Florin-Caluori, Fontana, Frigg-Walt, Furrer-Cabalzar, Gartmann-Albin, Giacomelli, Gunzinger, Hardegger, Hartmann (Cuira), Heiz, Holzinger-Loretz, Jaag, Jeker, Jenny, Joos, Kappeler, Kleis-Kümin, Koch (Tamins), Koch (Landquart), Kollegger (Malix), Krättli-Lori, Kunz (Cuira), Mani-Heldstab, Märchy-Caduff, Marti, Meyer-Grass, Michael (Castasegna), Michel, Müller, Nick, Niederer, Niggli (Samedan), Niggli-Mathis (Grüsch), Noi-Togni, Papa, Parolini, Parpan, Perl, Peyer, Pfäffli, Pfenninger, Pult, Rathgeb, Rosa, Sax, Steck-Rauch, Stiffler (Cuira), Tenchio, Thöny, Tomaschett (Breil), Tomaschett-Berther (Trun), Troncana-Sauer, Valär, Vetsch (Claustra Vitg), Vetsch (Pragg-Jenaz), Waidacher, Wieland, Zanetti, Zweifel-Disch, Hensel
Resposta da la regenza
Cun la nova concepziun da la gulivaziun da finanzas e da las incumbensas tranter la confederaziun ed ils chantuns (NGF) è la cumpetenza per finanziar las instituziuns per persunas cun impediments passada il 1. da schaner 2008 da la confederaziun als chantuns. Tenor l'art. 112 lit. b da la constituziun federala (CF) èsi dapi lura chaussa dals chantuns da promover l'integraziun da persunas cun impediments tras contribuziuns per la construcziun e per la gestiun da chasas da dimora, da lavuratoris e da centers da di. Tenor la regulaziun transitorica (art. 197 cifra 4 CF) ston ils chantuns cuntinuar a pajar almain durant 3 onns las "prestaziuns vertentas" da la confederaziun (q.v.d. las anteriuras contribuziuns da construcziun, d'installaziun e da gestiun da l'assicuranza d'invaliditad a chasas da dimora ed ad autras furmas collectivas d'abitar sco er a lavuratoris ed a centers da di). Il chantun ademplescha dal tuttafatg questa obligaziun. L'indemnisaziun finanziala d'instituziuns per persunas cun impediments è numnadamain fixada en la lescha revedida davart la promoziun da persunas cun impediments (lescha d'impedids; DG 440.000) tenor la medema metoda da calculaziun sco quella ch'è vegnida duvrada avant la NGF tras l'uffizi federal d'assicuranzas socialas (UFAS) (relasch general davart la realisaziun da la NGF en il chantun Grischun, M18 / 2006-2007, p. 1937 ss).
Tar las dumondas:
1. Il chantun na po betg reducir las anteriuras contribuziuns federalas, sche la quantitad resta la medema. Confurm a l'anteriura finanziaziun tras l'UFAS è l'indemnisaziun da las prestaziuns pli bassa mo, sch'ina instituziun n'ha betg il dumber fixà da dis d'assistenza u sch'ella generescha dapli gudogn. En quest cas na dovra ella betg las contribuziuns chantunalas en la dimensiun respectiva, quai che correspunda a la calculaziun da las contribuziuns vertenta tras l'UFAS.
2. Perquai ch'ils chantuns ston cuntinuar a pajar las "prestaziuns vertentas" da la confederaziun almain durant 3 onns, è la metoda da finanziaziun da la confederaziun vegnida preschentada detagliadamain en la lescha chantunala d'impedids. Ina part integrala da la finanziaziun federala è stada la limitaziun da las tariffas dal di. Quella na dastga er betg vegnir surpassada cun supplements d'assistenza. Il cussegl grond ha integrà questa limitaziun en la lescha d'impedids (art. 46a al.3). Sch'ina instituziun cuntanscha la contribuziun da gestiun maximala per di da dimora, na po questa contribuziun betg pli vegnir augmentada. Er in'adattaziun pervia da la chareschia n'è betg admessa. En cas da dis d'absenza sto ultra da quai – tenor la lescha – vegnir mess a quint in terz da la taxa per reducir l'indemnisaziun a persunas dependentas d'agid.
I na po betg vegnir exclus che tschertas instituziuns han stuì adattar la gestiun pervia da questas limitaziuns fixadas en la lescha d'impedids.
3. La constituziun federala oblighescha il chantun da cuntinuar a pajar almain durant 3 onns las prestaziuns vertentas da la confederaziun. Las instituziuns èn vegnidas infurmadas ils 19 da favrer 2010 davart l'import da la contribuziun da l'onn 2010. Sin questa basa ha il chantun fatg l'onn 2010 pajaments a quint per quartal. Perquai è garantida la finanziaziun da las instituziuns.
Il process e las cumpetenzas per fixar las contribuziuns dal chantun a las instituziuns per persunas cun impediments èn fixads en la lescha d'impedids. L'onn 2010 ha ina instituziun responsabla pretendì en quest process da relaschar ina disposiziun contestabla per ina contribuziun supplementara dal chantun. La fixaziun da la contribuziun supplementara dal chantun per ina instituziun ha consequenzas per ulteriuras instituziuns (art. 46f da la lescha d'impedids). Perquai è resultà in retard tar l'elavuraziun dals contracts da prestaziuns 2010.
20 da december 2010