Dumonda Pfenninger concernent novas dumondas davart Repower e davart ovras electricas a charvun
Sessiun: 19.10.2010
La resistenza e la sceptica envers l'engaschament da Repower en novas ovras electricas a charvun en spezial en la Germania dal nord (Brunsbüttel) na chalan betg. Ultra da las dumondas da princip e dal clima ch'èn vegnidas discutadas enfin ussa en moda cuntraversa mussan differents svilups da l'ultim temp la problematica da quest engaschament internaziunal en tecnologias che vegnan crititgadas fermamain or dal puntg da vista da la politica dal clima e che pon pervia da quai vegnir messas en dumonda.
Lingias grossas davart la sortida d'ulteriuras interpresas dal project "Brunsbüttel", en spezial da differentas ovras electricas da citads tudestgas, mussan in cler moviment da retratga. Quai betg sco ultim pervia da las novas prolungaziuns da la durada da manaschi per ovras nuclearas tudestgas che la regenza tudestga ha concludì e che mettan fermamain en dumonda er la rentabilitad da novas ovras electricas a charvun. Il remplazzament d'ovras electricas a charvun veglias che lavuran correspundentamain cun ina tecnica antiquada tras ovras novas e pli effizientas ch'è adina puspè vegnì punctuà en las discussiuns dal passà sto ultra da quai vegnir qualifitgà – en vista a la situaziun dal martgà e da la rentabilitad en l'economia d'energia tudestga – sco pretensiun protecziunistica.
La tenuta negativa da la populaziun grischuna envers in engaschament da Repower en ovras electricas a charvun da la Germania dal nord han – tenor ina retschertga represchentativa da Demoscope dal zercladur 2010 – dal rest bundant dus terzs da la populaziun. Igl è pia nairas uras da reponderar la strategia e la politica da Repower.
Il chantun Grischun posseda anc adina ina participaziun da 46% vi da questa interpresa ed ha delegà differentas represchentantas e differents represchentants en ses cussegl d'administraziun. Pervia da quai tschentain nus las suandantas dumondas a la regenza:
1. Tge interpresas resp. tge ovras electricas citadinas èn actualmain anc en il project da Brunsbüttel e tge participaziun al project (procentuala e finanziala) ha la Repower?
2. Tge interpresas svizras da la branscha d'electricitad sa participeschan anc a Brunsbüttel e tgeninas èn gia sa retratgas dal project?
3. È previs in ulteriur augment da la participaziun da Repower al project "Brunsbüttel"?
4. Co giuditgescha la regenza la rentabilitad da l'ovra electrica a charvun Brunsbüttel en vista a las novas relaziuns da l'economia resp. da la politica d'energia en Germania? Tge investiziuns preliminaras ha la Repower gia fatg resp. tge custs ha ella gia pajà per il project "Brunsbüttel" e co vegnan quels scuntrads?
5. Tge tenuta ha la regenza envers: l'import da charvun da crap or da la Columbia per far ir l'ovra electrica a Brunsbüttel en quai che reguarda la bilantscha ecologica ed ils standards socials? Ed envers ils ca. 150 girs cun camiuns che vegnan prognostitgads per di al lieu? Sco er envers las quantitads da substanzas nuschaivlas che la Südweststrom GmbH ha dumandà per Brunsbüttel da p.ex. 4000 tonnas dioxid sulfuric/oxid nitrogenic, 500 kilograms argient viv, 3 tonnas plum, 600 tonnas pulvra?
6. Tge scenaris per sortir dal project "Brunsbüttel" èn avant maun tar la Repower?
Cuira, ils 19 d'october 2010
Pfenninger, Thöny, Baselgia-Brunner, Bucher-Brini, Frigg-Walt, Gartmann-Albin, Jaag, Müller, Noi-Togni, Peyer, Pult, Hensel, Monigatti
Resposta da la regenza
En cas da la Repower SA (RE) sa tracti d'ina societad anonima (SA) ch'è quotada a la bursa. Tenor l'art. 716a DO è sulettamain il cussegl d'administraziun responsabel per la strategia d'ina SA. Davart quest tema e davart la strategia da la RE è la regenza gia s'exprimida en sia resposta dals 10 da mars 2009 a la "incumbensa da la fracziun da la PS concernent la retratga da la 'Rezia energia' dals projects per ovras electricas a charvun". Las explicaziuns ch'èn vegnidas fatgas da quel temp en chaussa valan anc adina.
Sin basa da las infurmaziuns da la RE prenda la regenza posiziun davart las novas dumondas sco suonda:
1. En cas dal project "Brunsbüttel" sa tracti d'in project da la gruppa tudestga "SüdWestStrom", da la quala fan part sco associadas circa 55 ovras electricas citadinas ed interpresas per il provediment d'energia oravant tut da la Germania. RE tegna actualmain 51 pertschient da la societad da project per l'ovra electrica da Brunsbüttel. A l'ovra electrica planisada a Brunsbüttel cun 1'800 megawatt (MW) ha la RE però l'intent da sa participar mo cun 10 fin 20 pertschient. Quai correspunda ad ina prestaziun da 200 MW fin 400 MW. La participaziun finanziala futura da la RE n'è actualmain anc betg fixada. Ella vegn a depender da la part d'energia che la RE vegn a posseder da l'ovra electrica.
2. I n'èn betg enconuschentas publicamain tut las interpresas svizras ch'èn s'obligadas resp. ch'èn s'interessadas per in'eventuala ovra electrica a Brunsbüttel. Percunter han ins pudì leger en la pressa che la Groupe E, la Romand Energie e l'Elektra Birseck Münchenstein han annunzià da vulair sa retrair dal project, quai che n'è dentant anc betg capità enfin oz.
3. La RE prenda en mira ina participaziun da prestaziun da 200 MW fin 400 MW. In augment n'è betg previs.
4. I n'è betg chaussa da la regenza da far prognosas da rentabilitad correspundentas. Per quai è responsabla la societad. Davart ils ristgs generals da la RE infurmescha ses rapport da gestiun. Tenor quel sa stenta la RE da minimar ils ristgs da la producziun cun agid d'in portfolio da project diversifitgà geograficamain e tecnologicamain per betg evitar l'accumulaziun da ristgs.
La RE lavura il medem mument vi da differents projects d'ovras electricas en Svizra ed a l'exteriur, bain savend che betg tut ils projects na pon vegnir realisads la fin finala. Ils custs per sviluppar quests projects vegnan mintgamai mess a quint a la societad da project respectiva. Ulteriuras infurmaziuns che quellas dal rapport da gestiun da l'interpresa n'èn betg avant maun.
5. Decisiuns davart la dumonda danunder ch'il charvun duessi derivar n'èn – tenor las infurmaziuns da la RE – anc vegnidas prendidas naginas. Quel po derivar da tut ils territoris d'explotaziun imaginabels dal martgà internaziunal. Areguard la bilantscha ecologica ed areguard l'observaziun dals standards socials en connex cun las furniziuns da charvun sa stenta la RE da fixar standards auts. Tenor la RE vegnan las limitas legalas per las emissiuns observadas en mintga cas. Per part vegnan questas limitas a sa chattar cleramain sut las valurs admissiblas. A Brunsbüttel na datti nagins girs cun camiuns per transportar il charvun. Il charvun vegn distgargià dal bastiment directamain en il port cunfinant e vegn transportà per indriz da transport ferroviar en il deposit da charvun.
Tar il deposit avert planisà vegnan las emissiuns da pulvra cumbattidas cun indrizs d'aspiraziun e cun indrizs da filter, cun indrizs da plievgia sco er cun cuvrir ils deposits passivs. Uschia pon er vegnir sutpassadas cleramain las limitas per emissiuns da pulvra.
6. Tenor las infurmaziuns da la RE sa chatta l'ovra electrica da Brunsbüttel en la fasa da svilup dal project. Decisiuns da construcziun e da participaziun n'èn anc vegnidas prendidas naginas. Correspundentamain n'èsi er betg necessari d'avair scenaris da sortida specifics. La RE examinescha però permanentamain tut ses projects. Quai vala er per il project concernent l'ovra electrica a Brunsbüttel. Per la RE na datti pia nagin motiv per vulair pregiuditgar proceduras da permissiun che curran actualmain.
02 da december 2010