Navigation

Inhaltsbereich

Dumonda Peyer concernent l'egualitad dals salaris en l'administraziun chantunala ed en ils instituts da dretg public

Sessiun: 14.02.2011
L'onn 2011 stat sut l'ensaina dals giubileums per l'egualitad tranter dunna ed um.

L'egualitad munta tranter auter survegnir il medem salari per la medema lavur. L'egualitad vul er dir las medemas schanzas sin il martgà da lavur.

En l'entira Svizra importan las differenzas da salari dentant anc adina stgars 20%. Ed en las plazzas da cader èn represchentads cleramain dapli umens che dunnas.

Per quest motiv dumondan las sutsegnadras ed ils sutsegnaders la regenza il suandant:

1. Vegnan anc pajads salaris da basa (senza supplements) sut 4'000.– francs brutto/mais respectivamain sut 22.– francs brutto/ura per ina plazza a temp cumplain en l'administraziun dal chantun Grischun u en las instituziun da dretg public? Sche gea, en tge secturs, e quantas persunas (ordinà tenor schlattaina) èn pertutgadas?

2. Vegnan constatads en l'administraziun dal chantun Grischun ed en las instituziuns da dretg public differenzas da salari pli grondas che 1:12? Sche gea, nua è quai il cas, co è la relaziun, e tge è il salari il pli aut respectivamain il salari il pli bass?

3. Co èn las plazzas repartidas en las posiziuns da cader tar l'administraziun dal chantun Grischun e tar las instituziuns da dretg public sco er tar lur cussegls d'administraziun respectivamain tar lur cumissiuns administrativas areguard la quota dunnas/umens?

4. Tge mesiras concretas interprenda la regenza per eliminar eventualas inegualitads e per procurar per in'egualitad effectiva?

Cuira, ils 14 da favrer 2011

Peyer, Thöny, Pult, Baselgia-Brunner, Bucher-Brini, Frigg-Walt, Gartmann-Albin, Jaag, Locher Benguerel, Müller, Noi-Togni, Pfenninger, Trepp, Monigatti

Resposta da la regenza

Resposta tar la dumonda nr. 1:

Da las 4437 emploiadas ed emploiads da l'administraziun dal chantun Grischun e dals instituts chantunals autonoms (senza la banca chantunala grischuna, che n'è betg suttamessa a la lescha chantunala dal persunal) survegnan 212 persunas (4,78%) cun ina plazza a temp cumplain in salari sut 4000 francs per mais, quai che correspunda ad in salari per ura da 24.57 francs (incl. 8.33 % indemnisaziun da vacanzas).

Dumonda Peyer concernent l'egualitad dals salaris en l'administraziun chantunala ed en ils instituts da dretg public Tab1

I sa tracta da persunas che lavuran en las categorias da funcziun emploiadas ed emploiads da cuschina (hotellaria), persunas che fan lavurs da nettegiar, pedellas e pedels, persunas da surveglianza, emploiadas ed emploiads en l'agricultura sco er en la tgira ed en l'assistenza d'agid. En l'art. 15 da l'ordinaziun dal persunal che vala dapi il 1. da schaner 2007 è fixà per persunas cun ina plazza a temp cumplain in salari minimal da 3000 francs per mais. Quest salari na vegn sutpassà en nagin cas.

 

Resposta tar la dumonda nr. 2:

Na. La proporziun en la scala da salarisaziun che va da la classa da salari 1 minimum fin a la classa da salari 28 maximum importa 1:6,1.

 

Resposta tar la dumonda nr. 3:

Dumonda Peyer concernent l'egualitad dals salaris en l'administraziun chantunala ed en ils instituts da dretg public Tab2


Resposta tar la dumonda nr. 4:

L'onn 2010 ha la regenza approvà in plan da classificaziun ch'era vegnì revedì totalmain. Dapi che quel è en funcziun èn vegnidas valitadas fin oz circa 900 funcziuns tenor il stadi scientific actual. Quai includa ina libertad da discriminaziun attestada che garantescha l'egualitad da las dunnas e dals umens.

Disparitads en il senn ch'i na dat betg tuttina bleras dunnas sco umens en la medema classa da funcziun n'èn betg dependentas dal sistem da valitaziun u da pussaivladads d'access a las funcziuns limitadas, mabain da la disponibilitad da collavuraturas e da collavuraturs per ina incumbensa e da las annunzias correspundentas. Ina proposta per cumbatter talas disparitads è da crear impuls che faciliteschan a las dunnas l'access a gruppas professiunalas ch'èn tradiziunalmain occupadas dad umens. Quai ha er da far cun scalas da valur da la societad. En quest sectur ha cumenzà in process da reponderaziun al qual i sto vinavant vegnir fatg attenziun.

L'administraziun chantunala sco patruna po stgaffir premissas che faciliteschan a las schlattainas da meglierar la cumpatibilitad tranter la famiglia e la professiun. Uschia resultan ils medems spazis libers per il svilup da preferenzas professiunalas persunalas. Per motivs da l'economia da manaschi daventan plazzas parzialas però tendenzialmain adina pli stgarsas pli fitg che l'autezza da l'ierarchica crescha en l'organisaziun. Las bleras posiziuns da cader sa laschan divider mo cun gronds dischavantatgs.

En il sectur da l'organisaziun da la lavur ch'è favuraivla per famiglias ha la regenza instradà las suandantas mesiras:

  • L'onn 2010 ha ina gruppa da lavur elavurà il 'project cumpatibilitad da la famiglia cun la professiun' e communitgà a la regenza ses rapport. L'uffizi da persunal è vegnì incumbensà d'integrar las enconuschientschas en la discussiun en connex cun la proxima revisiun da la lescha dal persunal.
  • Quest onn è vegnida concludida ina revisiun totala da l'ordinaziun davart il temp da lavur. Quella prevesa numerusas furmas da temp da lavur. Cun il temp da lavur cun uras da bloc relativamain curtas, è la suveranitad dal temp da las collavuraturas e dals collavuraturs resguardada per gronda part.
  • Quest onn ha la regenza incumbensà l'uffizi da persunal d'elavurar ina strategia per il persunal 2013 – 2022 e dad integrar er questa tematica en l'elavuraziun.

15 d'avrigl 2011