En il Grischun sco chantun turistic ha il sport ina fitg gronda impurtanza. Mo gia las uniuns grischunas da sport che fan part da l'associaziun grischuna da sport han passa 70'000 commembras e commembers. Vitiers vegnan numerusas autras sportistas e sportists – saja quai en uniuns betg affiliadas, saja quai senza esser commembras u commembers d'uniuns da sport. Ins dastga constatar ch'il sport è etablì en la societad grischuna.
Er il chantun s'engascha per il sport. Il post chantunal per quest intent è grischun sport. Ina da sias incumbensas principalas è la realisaziun da l'ovra federala da promoziun dal sport "giuventetgna+sport" en il chantun Grischun. Ultra da quai lavura grischun sport er en ils suandants secturs: organisaziun da champs da giuventetgna, educaziun sportiva, promoziun dal sport privat en il rom dal fond da sport, promoziun da las sportistas e dals sportists giuvens en il rom da Swiss olympic, promoziun d'implants da sport, sport da persunas creschidas sco er projects da promoziun dal sport e dal moviment. Grischun sport s'occupa pia d'in vast spectrum entaifer il sport.
Malgrà la gronda impurtanza dal sport maina grischun sport – ord vista organisatorica – ina povra vita: Entaifer il departament d'educaziun, cultura e protecziun da l'ambient è grischun sport mo ina partiziun "sport" da l'uffizi per la scola populara ed il sport. Quai cuntrari a pli baud, cura ch'il chantun Grischun aveva anc in uffizi da sport. Qua tras vegnan emess dus signals fauss: Per l'ina sa chatta grischun sport ierarchicamain sin il stgalim chantunal il pli bass. Per l'autra vegn grischun sport posiziunà en il sectur da la scola populara.
Quest posiziunament sin il stgalim il pli bass na po betg tegnair quint da l'impurtanza pli e pli gronda dal sport en il Grischun. Ed ella sa differenziescha er frappantamain d'auters chantuns (p.ex. ZH u SG). Ed il posiziunament dal sport en il sectur da la scola populara è materialmain nunmotivà, damai che mo ina pitschna part da las incumbensas concerna il sport da scola. Ils puncts communabels cun auters secturs predomineschan cleramain (cunzunt cun il sport da dretg privat resp. cun il sport d'uniun, cun G+S sco er cun il fond da sport).
Sin basa da las ponderaziuns numnadas s'impona in augment dal status da grischun sport cun agid d'ina nova classificaziun ierarchica sco uffizi da sport. Quai correspunda er al giavisch dal sport grischun privat. Colliada cun quai fiss ina gronda stima per il sport cun in effect da signal correspundent.
Dacurt ha il cussegl grond acceptà l'incumbensa dal deputà Christian Rathgeb concernent il relasch d'in concept chantunal da sport. En il rom dal concept da promoziun dal sport, che sto ussa vegnir elavurà sin basa da questa incumbensa, èsi cunvegnent d'examinar tant las rollas da las federaziuns privatas sco er las structuras dal chantun.
Las sutsegnadras ed ils sutsegnaders dumondan, sche la regenza è pronta – en il rom dal concept chantunal da promoziun dal sport – d'augmentar il status da grischun sport cun crear in uffizi da sport.
Cuira, ils 8 da december 2011
Cavegn, Perl, Michael (Donat), Aebli, Albertin, Barandun, Berther (Mustér), Berther (Camischolas), Blumenthal, Bondolfi, Caduff, Caluori, Casty, Casutt, Casutt-Derungs, Clalüna, Della Vedova, Dermont, Dosch, Engler, Fasani, Foffa, Fontana, Geisseler, Giacomelli, Grass, Gunzinger, Hartmann (Cuira), Heiz, Hitz-Rusch, Holzinger-Loretz, Jeker, Joos, Kleis-Kümin, Koch (Tumein), Kollegger (Cuira), Kollegger (Malix), Komminoth-Elmer, Kunz (Fläsch), Lorez-Meuli, Märchy-Caduff, Meyer-Grass, Michel, Montalta, Niederer, Niggli-Mathis (Grüsch), Noi-Togni, Papa, Parolini, Parpan, Pedrini, Rathgeb, Righetti, Sax, Steck-Rauch, Stiffler (Tavau Plaz), Stiffler (Cuira), Tomaschett (Breil), Tomaschett-Berther (Trun), Waidacher, Zanetti, Bürgi-Büchel, Degonda, Monigatti
Resposta da la regenza
Fin l'onn 2003 è l'uffizi da sport stà in da totalmain 18 posts da servetsch autonoms entaifer il departament d'educaziun, cultura e protecziun da l'ambient (DECA). Al schef dal departament eran suttamessas directamain 22 persunas (da quai 21 forzas da cader). La structura organisatorica e directiva dal DECA n'era da quel temp betg buna pli d'ademplir las pretensiuns creschentas envers ina lavur administrativa effizienta. Las pretensiuns d'augmentar persistentamain l'effizienza sco er da franar ils custs han pia pudì vegnir realisadas mo tras ina reorganisaziun cumplessiva da las structuras entaifer il DECA.
Ils 18 da favrer 2003 (prot. nr. 224) ha la regenza concludì da reducir il dumber da posts da servetsch entaifer il DECA, e quai da 18 a 6. Ils servetschs dal departament èn vegnids concepids sco post da stab e suttamess directamain al schef dal departament. L'uffizi da sport è vegnì integrà en l'uffizi per la scola populara ed il sport sco partiziun "sport". Cun il conclus da la regenza dals 10 da matg 2005 (prot. nr. 550) èn plinavant l'uffizi per las scolas medias e l'uffizi per la furmaziun terziara vegnids fusiunads per il 1. da schaner 2006 a l'uffizi per la furmaziun media-superiura dad oz, uschia ch'il dumber da posts da servetsch è vegnì reducì a 5.
La structura organisatorica e directiva dal DECA sa preschenta oz sco suonda (stadi: 1. da schaner 2012):
La partiziun "sport" è ina da las pli pitschnas partiziuns entaifer il DECA. Ella ha actualmain 5 collavuraturas e collavuraturs resp. 500 pertschients da plazzas ed è pia circa otg giadas pli pitschna ch'il post da servetsch il pli pitschen dal DECA. Mo gia sin basa dal princip d'ina gestiun publica effizienta n'èsi perquai betg giustifitgà da concepir da nov questa partiziun sco uffizi resp. sco post da servetsch autonom.
Sa basond sin l'incumbensa Rathgeb concernent il relasch d'in concept chantunal da sport (sessiun d'avust 2010, PVAU 4; conclus da la regenza dals 18 d'october 2010, prot. nr. 949) stoi vegnir elavurà in concept chantunal per promover il sport che tegna quint da tut ils entretschaments socials dal sport sut tut ils aspects pussaivels. I duai vegnir definì, nua che la promoziun dal sport è ina incumbensa dal stadi e nua ch'ella è ina incumbensa da las uniuns organisadas tenor il dretg privat. Ils differents aspects dal sport da scola, dal sport en federaziuns, dal sport en uniuns e dal sport individual duain vegnir illustrads, ed i duain vegnir mussadas pussaivladads da coordinaziun correspundentas. En quest connex vegn la regenza a sclerir e – nua che quai è necessari – a definir da nov cunzunt er il champ d'incumbensas da grischun sport sco partiziun da l'uffizi per la scola populara ed il sport. Ina reorganisaziun fundamentala dal DECA na s'impona dentant betg pervia da quai, tant pli perquai che la structura organisatorica e directiva dal DECA, ch'è vegnida definida l'onn 2003, è sa cumprovada cleramain ord vista dad oz.
09 da favrer 2012