Igl è l'incumbensa da la direcziun da mintga interpresa da segirar la cuntinuitad da l'interpresa a lunga vista. En cas d'ina interpresa per il provediment d'energia cumpiglia questa incumbensa er il svilup da novs projects d'ovras electricas. La lavur da svilup è cumplexa. I ston vegnir percurridas proceduras da permissiun fitg differentas ch'èn pretensiusas e che chaschunan gronds custs, manadas tractativas davart prestaziuns e taxas sco er dumagnadas sfidas tecnicas. La finala, avant la decisiun da construcziun, sto pudair vegnir cumprovada en moda pretensiusa la rentabilitad e garantida la finanziaziun. Cunquai che las proceduras duran adina plirs fin blers onns, pon las cundiziuns generalas sa midar decisivamain en il decurs dal temp, uschia che projects na pon betg pli vegnir permess u che lur rentabilitad n'è betg pli dada. In project po pia fruntar sin differents obstachels ed uschia far naufragi. Per in svilup persistent d'in parc da producziun diversifitgà e per segirar las ristgas sto perquai – dal puntg da vista da l'interpresa – vegnir persequità a medem temp in grond dumber da projects.

Igl è chaussa da la direcziun e dal cussegl d'administraziun d'examinar cuntinuadamain il portfolio da projects e da decider tge projects ch'èn raschunaivels e che permettan success respectivamain tgenins che n'adempleschan betg pli questas premissas e che na duain betg vegnir sviluppads vinavant. La Repower dovra energia da la chargia da basa per sustegnair l'activitad da commerzi e da distribuziun e per segirar las ristgas. Ina pussaivladad è quella da sa participar a la construcziun da novas ovras electricas per la chargia da basa. Perquai sa participescha l'interpresa d'ina vart al svilup da duas novas ovras electricas a charvun fitg modernas ed effizientas e da l'autra vart ad auters projects d'ovras electricas. La chargia da basa è e resta ina premissa impurtanta per mantegnair segir il provediment e stabila la rait, en spezial er, suenter che differents stadis ed er la Svizra han decidì da sortir da l'energia nucleara. La Repower è da l'avis che la strategia duai vegnir examinada cuntinuadamain, ed ella fa adattaziuns periodicas.

Tar las dumondas:

1./2. La Repower publitgescha tut las cifras ch'èn necessarias per infurmar en moda transparenta tut las acziunarias e tut ils acziunaris en il rom da las prescripziuns areguard il rendaquint tenor ils IFRS ed en il rom da las prescripziuns dal dretg da bursas. Questas cifras èn publitgadas en ils rapports da gestiun. Valair vala il princip dal tractament egual da tut las acziunarias e da tut ils acziunaris. Correspundentamain n'èn enconuschentas a la regenza naginas cifras supplementaras per quests projects. Sche projects vegnan sviluppads en collavuraziun cun partenarias e partenaris, sco a Brunsbüttel u a Saline Joniche, vegnan per regla suttascrittas cunvegnas confidenzialas che restrenschan er tras contract la publicaziun d'infurmaziuns. Sche la valur dals projects n'è betg pli dada, sto vegnir fatga stringentamain ina rectificaziun da la valur tenor ils standards da rendaquint.

3. La Repower sa stenta d'infurmar en moda cumplessiva davart ses projects. Tenor la Repower èn ils custs che vegnan chaschunads tras quai en Italia en il rom da quels che vegnan chaschunads er en auters projects (p.ex. Taschinas u Lagobianco).

4. Tar tut ils projects existan ristgas. Tenor atgnas indicaziuns emprova la Repower da controllar quellas uschè bain sco pussaivel e da betg surpigliar ristgas sproporziunadas. Ultra da quai dispona la Repower d'in controlling e d'in manaschament da las ristgas correspundent che vegn amplifitgà cuntinuadamain. Il success ch'il svilup da la gruppa da Repower ha gì ils ultims onns è stà pussaivel mo, perquai che l'interpresa ha surpiglià ristgas en moda controllada.
Igl è l'incumbensa dal cussegl d'administraziun d'examinar ils projects e da procurar ch'ils interess da l'interpresa e pia da las acziunarias e dals acziunaris vegnian fatgs valair il meglier pussaivel. Igl è er sia obligaziun da realisar in giudicament da las ristgas. Quai vala er avant la construcziun d'ina eventuala nova ovra electrica. Uschenavant che la regenza po giuditgar quai, ha il cussegl d'administraziun ademplì sias incumbensas ils ultims onns.

16 da favrer 2012