La dumonda sa referescha a las duas iniziativas federalas per il respargn immobigliar che vegnan en votaziun durant l'emprima mesadad da quest onn. A la regenza vegnan tschentadas differentas dumondas che vegnan respundidas qua sutvart.

1. L'iniziativa svizra per il respargn immobigliar da la societad svizra per la promoziun dal respargn immobigliar duai pussibilitar als chantuns d'integrar ina deducziun per il respargn immobigliar en lur legislaziun. Perquai ch'i stat liber als chantuns, sch'els vulan introducir ina deducziun per il respargn immobigliar, na chaschuna l'iniziativa naginas perditas da taglia directas. Questas perditas resultan pir il mument ch'il chantun creescha ina deducziun correspundenta; ellas fissan pia la consequenza da la legislaziun chantunala e betg da l'iniziativa. La discharmonisaziun dal dretg fiscal chaschunada tras l'iniziativa – ina discharmonisaziun tranter la confederaziun ed ils chantuns sco er tranter ils chantuns – vegn refusada cleramain da la regenza.

2. Cun l'iniziativa "Access a la proprietad grazia al respargn immobigliar" da l'associaziun svizra dals proprietaris da chasas duai vegnir introducida ina deducziun per il respargn immobigliar da maximalmain 10'000 francs tar la confederaziun e tar tut ils chantuns; en cas da conjugals suttamess communablamain a la taglia ha mintga conjugal il dretg da far questa deducziun. Las perditas da taglia na pon betg vegnir eruidas, perquai ch'i na dat nagins indizis quants pajataglias che vegnissan a far diever da questa deducziun ed en tge dimensiun.

3. La taxaziun tenor la capacitad economica è – ensemen cun la prescripziun da l'egualitad giuridica – il princip fundamental dal dretg da taglias sin las entradas. Ina intervenziun en il princip da la capacitad economica basegna formalmain ina basa sin il stgalim da la constituziun, ina basa che vegniss creada cun las duas iniziativas. Ina intervenziun en il princip da la capacitad economica basegna dentant er ina motivaziun materiala. Cun l'intervenziun stoi vegnir empruvà da cuntanscher ina finamira equivalenta e l'intervenziun sto esser adattada per cuntanscher questa finamira. Sco finamira equivalenta da la constituziun pudess vegnir chapida la promoziun da la proprietad d'abitaziuns tenor l'art. 108 da la constituziun federala. La regenza è dentant cleramain da l'avis ch'ina deducziun per il respargn immobigliar vegnia a chaschunar mo in pitschen augment da la quota da la proprietad d'abitaziuns; ditg cun auters pleds n'è ella betg adattada per cuntanscher questa finamira. La regenza spetga plitost in effect considerabel da repercussiuns collateralas, perquai che cunzunt ils pajataglias che vegnan ad acquistar proprietad d'abitar, vegnissan a far diever da questa deducziun. Dal puntg da vista da questas ponderaziuns vesa la regenza en la deducziun per il respargn immobigliar ina violaziun dal princip da la taxaziun tenor la capacitad economica.

4. En differentas consultaziuns ha la regenza adina refusà la deducziun per il respargn immobigliar ed ella na vesa nagin motiv da revegnir a quest giudicament. Tenor la pratica na s'exprima la regenza dentant betg en il cumbat da votaziun, sch'il chantun Grischun n'è betg pertutgà pli fitg ch'ils auters chantuns d'ina dumonda.

5. Il mument na datti nagina basa statistica actuala per respunder la dumonda davart la quota da la proprietad d'abitaziuns. Ils onns 1990 fin 2000 è la quota da la proprietad d'abitaziuns s'augmentada en il Grischun da 43,5 % a 46,7 % e sa chatta pia cleramain sur la media svizra da 31,3 % resp. 34,6 %. Tenor in studi da la Credit Suisse davart il martgà d'immobiglias 2011 vegn stimada la quota da la proprietad d'abitaziuns en il chantun Grischun l'onn 2011 a 54,2 %. Quant enavant che questa stimaziun correspunda a las relaziuns effectivas na po la regenza betg giuditgar.

07 da mars 2012