Entant ch'il chantun Grischun obtegna dapi onns gronds surplis da finanzas ed entant ch'el ha gia furmà reservas da passa 1 milliarda francs, datti in svilup pauc allegraivel sin plaun economic. Novas retschertgas mussan ch'il Grischun è – puncto cumpetitivitad – in dals quatter chantuns ils pli flaivels da tut ils chantuns da la Svizra.
Il Grischun, sco chantun cun la pli gronda surfatscha, è caracterisà da sia situaziun amez las Alps. Pervia da quai èn restrenschids ses intschess e sia cuntanschibladad. La gronda dependenza dal turissem influenzescha sia dinamica e sia diversificaziun. Ina valur sut la media pertutgant l'innovaziun al engrevgescha medemamain. In effect positiv per sia cumpetitivitad han percunter la libertad d'agir pertutgant las finanzas, l'effizienza da las finanzas sco er ils conturns dals custs.
In fatg decisiv a favur d'in svilup economic positiv è – tranter auters facturs impurtants sco la qualitad da viver, ils custs da viver particularmain per l'abitaziun e la disponibladad da bunas plazzas da lavur bain pajadas e.u.v. – in clima fiscal attractiv. Quel attira novas firmas ed augmenta la pussaivladad da far investiziuns da las firmas existentas. La finala n'èsi betg mo ina consequenza urgenta da la votaziun davart l'iniziativa cunter las abitaziuns secundaras ch'il chantun promova ussa la creschientscha economica cun meglierar las cundiziuns generalas per firmas e cun fixar la grevezza fiscala uschia che firmas pon investir en ina dimensiun pli vasta e pia generar novas plazzas da lavur.
Il "Zürcher Steuerbelastungsmonitor 2011" mussa ch'il chantun Grischun figurescha – en la cumparegliaziun naziunala – areguard la taxaziun da persunas giuridicas, en la segunda mesadad. Blers chantuns da muntogna cumparegliabels èn plazzads avant nus. Sin fundament da la buna libertad d'agir pertutgant las finanzas dal chantun Grischun sto la cundiziun generala fiscala per persunas giuridicas vegnir meglierada. La taglia sin il chapital na duai betg vegnir midada en il Grischun pervia da la structura speziala d'interpresa.
Nus pretendain la suandanta midada da la lescha da taglia:
Artitgel 87, alinea 1
La taglia sin il gudogn importa 4,5 pertschient (fin ussa 5,5 pertschient).
Cuira, ils 20 da mars 2012
Nigg, Davaz, Kunz (Cuira), Bezzola (Samedan), Brandenburger, Burkhardt, Casutt, Clalüna, Engler, Fontana, Giacomelli, Grass, Hartmann (Cuira), Jeker, Koch (Igis), Komminoth-Elmer, Kunz (Fläsch), Papa, Righetti, Waidacher, Wieland, Patt, Toutsch
Resposta da la regenza
L'incumbensa Nigg propona da reducir la tariffa da la taglia sin il gudogn dad actualmain 5,5 % a da nov 4,5 %.
La tariffa da la taglia sin il gudogn è vegnida reducida ils ultims onns da 15 % (fin l'onn 2007) a 7 % (a partir da l'onn 2008) ed alura a 5,5 % (dapi l'onn 2010). Ultra da quai è l'onn 2008 vegnì reducì il pe da taglia da las taglias chantunalas da 105 % a 100 % e l'onn 2010 il pe da taglia da las taglias supplementaras da 101 % a 99 %. Questas mesiras han permess da reducir la grevezza fiscala effectiva, q.v.d. la grevezza fiscala sin il gudogn avant che deducir las taglias, per tut las suveranitads fiscalas da 29,1 % l'onn 2007 a 16,7 % a partir da l'onn 2010.
En il program da la regenza 2013 fin 2016 ha la regenza fixà sco finamira da mantegnair la cumpetitivitad dal Grischun sco lieu d'interpresas e da la meglierar levamain, e quai cun taglias modestas sin il gudogn e sin il chapital (champ d'acziun1, situaziun da partenza 4, missiva nr. 11 / 2011-2012, p. 1289). Questa finamira duai vegnir cuntanschida cun reducir la taglia sin il gudogn e sin il chapital. Quai vegn constatà en il punct central da svilup 24 dal program legislativ 2013 fin 2016 (al lieu cità, pagina 1341). Per questa finamira èn previsas en las mesiras ed en las finanzas a partir da l'onn da gestiun 2016 entradas pli pitschnas da 16 milliuns francs (al lieu cità, pagina 1310). Cun midar tar il princip da la limitaziun da taglia sco consequenza dal nov model da contabilitad MAC2 vegnan las entradas pli pitschnas a resultar da nov gia per l'onn da gestiun 2015.
La dumonda da reducir la taglia sin il gudogn da l'incumbensa na surpassa betg las mesiras che la regenza ha insumma gia previs, uschia che la regenza po proponer d'acceptar l'incumbensa Nigg.
27 da zercladur 2012