Dumonda Schucan concernent la realisaziun da l'iniziativa cunter las abitaziuns secundaras/proposta d'ina permissiun d'acquist
Sessiun: 16.04.2012
L'acceptaziun da l'iniziativa cunter las abitaziuns secundaras maina a midadas radicalas per l'economia da construcziun, per il turissem e per las finanzas communalas. Tut tenor l'interpretaziun metta ella en dumonda la garanzia da la proprietad e chaschuna uschia grondas malsegirezzas. Sco cumplettaziun da la resoluziun dal cussegl grond dovri in concept general per realisar l'iniziativa cunter las abitaziuns secundaras. Ultra dal rinforzar l'economia per mitigiar las midadas da structura ed ultra da mesiras per garantir che las finanzas da las vischnancas e dal chantun restian saunas sa recumondi d'introducir ina permissiun d'acquist sco mesira accumpagnanta. Per quai vegn la contingentaziun distatgada da la construcziun (permissiun da construcziun/purschida) e liada a la dumonda (acquist/midada da maun).
L'acquist da la proprietad d'ina abitaziun per la duvrar sco abitaziun secundara vegn lià ad ina permissiun contingentada. Uschia po vegnir dirigida la dumonda ch'è relevanta per il martgà d'abitaziuns. La repartiziun ad ina categoria d'object vegn fixada da nov mintga giada ch'i dat ina midada da maun. Sch'in cumprader d'ina abitaziun ha ina permissiun per duvrar quella sco abitaziun secundara, po el duvrar ella senza restricziuns. Senza ina permissiun correspundenta vegn l'abitaziun cumprada registrada sco emprima abitaziun. Questa inscripziun vala fin a la proxima midada da maun. Uschia po l'utilisaziun d'in object midar en il decurs dal temp.
La permissiun n'è betg negoziabla, ma ertavla resp. transmissibla en lingia directa. La cuntravalur d'ina tala permissiun duai vegnir prelevada ed impundida per promover spazi d'abitar per la populaziun indigena, infrastructura turistica ed hotellaria sco er per cumpensar las perditas da rendita en las vischnancas.
Per garantir la proprietad ed il possess actual survegnan ils possessurs vertents d'abitaziuns secundaras ed ils possessurs d'abitaziuns tenor il dretg vegl en il rom da las disposiziuns transitoricas ina permissiun correspundenta gratuita per duvrar libramain lur object. Els e lur descendents pon pia duvrar ils objects pertutgads sco emprima abitaziun u sco abitaziun secundara. Sche l'object vegn vendì, daventa el in'emprima abitaziun, sche la permissiun d'acquist manca. Las controllas necessarias correspundan a las controllas actualas. En mintga cas inscriva l'uffizi dal register funsil l'object sco emprima abitaziun, sche – en cas d'ina midada da maun – la permissiun d'acquist per l'utilisaziun sco abitaziun secundara manca (independentamain da la categorisaziun vertenta) e communitgescha quai a la vischnanca. Per cuntravenziuns ston vegnir previsas sancziuns correspundentas.
Cun il temp vegnan vendids tut ils objects. Uschè ditg che la quota correspundenta contingentada da las midadas da maun che han ina permissiun d'acquist per duvrar spazi d'abitar sco abitaziun secundara è pli pitschna che la quota d'abitaziuns secundaras existenta maina l'applicaziun da quest instrument cun il temp a l'observaziun da la quota che l'iniziativa prescriva. Per exempel pon ils contingents per permissiuns d'acquist vegnir fixads a mintgamai 20 % da las midadas da maun da l'onn precedent. Questa soluziun resguarda pia las directivas da l'iniziativa e pussibilitescha il medem mument da renconuscher il possess actual da las abitaziuns tenor il dretg vegl. Er sche las abitaziuns tenor il dretg vegl vegnan tractadas cun ina tscherta prioritad tar l'attribuziun da permissiuns, vegn la finamira da l'iniziativa observada.
Dumondas:
1. È la regenza er da l'avis che la soluziun proponida possia gidar a realisar ordinadamain l'iniziativa cunter las abitaziuns secundaras, resguardond il medem mument il possess actual?
2. È la regenza pronta da s'engaschar per che questa soluziun vegnia realisada?
3. Tge premissas ston esser ademplidas per quai?
4. Per il cas ch'igl èn avant maun abitaziuns betg duvradas, en spezial en regiuns periferas, resguarda la regenza alura ina regulaziun sco raschunaivla che permetta excepziunalmain er contingents pli gronds per permissiuns d'acquist?
5. È la regenza er da l'opiniun che la preferenza da realisar projects d'infrastructura, da rinforzar la promoziun dal turissem, da promover emprimas abitaziuns ed abitaziuns secundaras explotadas possia mitigiar las consequenzas da l'iniziativa cunter las abitaziuns secundaras? Tge mesiras concretas prevesa la regenza?
6. Quant grondas èn las perditas d'entradas per il chantun e per las vischnancas, cun las qualas i sto vegnir fatg quint pervia da l'iniziativa cunter las abitaziuns secundaras?
7. Resguarda la regenza ina taglia sin abitaziuns secundaras sco er la taxa ch'è vegnida menziunada qua survart en cas d'in acquist d'in object per al duvrar sco abitaziun secundara sco raschunaivlas e suffizientas per cumpensar las perditas d'entradas spetgadas?
8. Tge basas legalas ston vegnir stgaffidas resp. adattadas? È la regenza pronta da prender per mauns quellas adattaziuns?
Cuira, ils 16 d'avrigl 2012
Schucan
Resposta da la regenza
Tar las dumondas 1 fin 4 (permissiun d'acquist)
Las dumondas 1 fin 4 concernan l'introducziun d'ina permissiun d'acquist per abitaziuns sco ch'ella vegn proponida dal sutsegnader. Sche la regenza enclegia endretg il sutsegnader duai l'acquist d'abitaziuns, che duain pudair vegnir duvradas sco abitaziuns secundaras suenter l'acquist, vegnir suttamess ad in'obligaziun da dumandar ina permissiun. Questas permissiuns duain primo vegnir contingentadas (p.ex. a 20 % da las midadas da maun che han gì lieu l'onn passà en la vischnanca respectiva) e secundo suttamessas ad ina taxa (a favur da la promoziun da la construcziun d'emprimas abitaziuns). Abitaziuns, per las qualas il cumprader na procuran betg per ina permissiun d'acquist, stuessan vegnir duvradas per forza sco emprimas abitaziuns.
La realisaziun legislativa da la nova disposiziun constituziunala davart las abitaziuns secundaras è chaussa da la confederaziun. Per quest intent planisescha ella ina revisiun parziala da la lescha davart la planisaziun dal territori. Perquai che quest process dastgass durar plirs onns elavurescha actualmain ina gruppa da lavur installada dal DATEC in'ordinaziun federala, cun la quala duain vegnir scleridas – en il senn d'ina regulaziun transitorica fin al relasch da questa lescha – las dumondas las pli urgentas che na vegnan betg regladas dal text constituziunal. En il rom da la gruppa da lavur menziunada s'engascha la regenza tranter auter che las abitaziuns existentas tenor il dretg vegl na vegnian betg tangadas da la nova disposiziun constituziunala, uschia ch'ellas na vegnan er en il futur betg suttamessas a restricziuns davart l'utilisabladad e davart la disponibladad sco emprima abitaziun u sco abitaziun secundara, e quai er betg suenter ina midada da maun. A questas stentas ch'èn vegnidas fatgas per evitar che la valur da l'effectiv d'immobiglias indigen scroda e ch'èn vegnidas resguardadas en il fratemp en il sboz da consultaziun da l'ordinaziun federala s'oppona la soluziun d'ina permissiun d'acquist contingentada e taxada sco ch'ella vegn proponida en la dumonda qua avant maun. Ina limitaziun e/u ina taxaziun da las midadas d'utilisaziun d'emprimas abitaziuns dal dretg vegl sco abitaziuns secundaras sto vegnir examinada mo, sche talas midadas d'utilisaziun chaschunan in svilup betg giavischà (p.ex. expulsiun da la populaziun indigena dals centers dals vitgs a la periferia) u sch'i vegn fatg abus d'ellas. Per tals cas prevesa il sboz da consultaziun da la nova ordinaziun federala menziunà perquai er in'obligaziun dals chantuns e da las vischnancas da prender las mesiras correspundentas en la planisaziun dal territori (art. 3 al. 2 da l'ordinaziun).
Tar las dumondas 5 fin 8
La nova disposiziun constituziunala davart la construcziun d'abitaziuns secundaras (art. 75b Cst.) ch'è vegnida acceptada ils 11 da mars 2012 vegn pelvaira ad avair consequenzas considerablas per l'economia publica e finanziala sco er per la garanzia da la proprietad en las vischnancas respectivas resp. en ils chantuns pertutgads. La dimensiun precisa n'è actualmain anc betg previsibla. Ella dependa essenzialmain da la concepziun da la legislaziun executiva, en spezial da la definiziun da la noziun da l'abitaziun secundara. Correspundentamain èsi anc memia baud da prender mesiras concretas.
En general s'engascha la regenza en collavuraziun cun ils auters chantuns pertutgads, che la realisaziun da la nova disposiziun constituziunala vegnia fatga cun resguardar l'entir context da dretg constituziunal. Latiers tutgan tranter auter la politica da structura, il resguard dal territori da muntogna, la nova politica regiunala, il mantegniment da l'urbanisaziun decentralisada sco er la garanzia da la proprietad. Sche necessari ston – en collavuraziun cun la confederaziun – vegnir sviluppads e realisads mesiras accumpagnantas per mitigiar las consequenzas economicas negativas sco er models per ina nova orientaziun da las structuras dals alloschaments turistics.
28 da zercladur 2012