Cun ina disposiziun dal departament dals 22 da december 2011 ha la regenza infurmà las vischnancas davart la fixaziun dals custs renconuschids e davart la participaziun maximala als custs da las persunas che retiran prestaziuns en las chasas da persunas attempadas e da tgira l'onn 2012. Il medem di ha la regenza er infurmà las vischnancas davart la fixaziun dals custs renconuschids e davart la participaziun als custs da las persunas che dovran servetschs da la tgira e da l'assistenza a chasa cun e senza incarica da prestaziun communala.
Sco ch'ins sa vegnan ils custs renconuschids per las chasas da persunas attempadas e da tgira repartids en la relaziun da 25 % a donn e cust dal chantun e da 75 % a donn e cust da las vischnancas, entant ch'ils custs da la tgira da la spitex vegnan surpigliads a 55 % dal chantun ed a 45 % da la vischnanca. Da l'autra vart vegnan ils custs renconuschids per la tgira a l'ospital surpigliads a 90 % dal chantun ed a 10 % da las vischnancas.
Da nov prevesa ussa la disposiziun dal departament dals 22 da december 2011 per las chasas da persunas attempadas e da tgira e per la tgira da la spitex ch'ils custs per la tgira acuta e transitorica inditgada dal medi vegnan surpigliads – tenor la reglamentaziun federala – da las cassas da malsauns e dal stadi 14 dis suenter la relaschada da l'ospital. Perquai ch'i sa tracta qua anc adina da la tgira e da l'assistenza dal provediment acut fissi logic da repartir sia finanziaziun tenor la clav da la finanziaziun dals ospitals, e però en la relaziun da 90 % per il chantun e da 10 % per las vischnancas. Ina tala intenziun è schizunt formulada explicitamain en la disposiziun dal departament dals 22 da december 2011 davart la fixaziun dals custs renconuschids en las chasas da persunas attempadas e da tgira. L'intenziun cumpara sin pagina 3 dal document (chapitel 1.3, 2. alinea, tgira acuta e transitorica en las chasa da tgira): "Ils custs da tgira vegnan finanziads tenor las reglas da la finanziaziun dals ospitals." Questa decleraziun na vegn però betg surpigliada en la tabella correspundenta agiuntada che prevesa ina participaziun dal chantun per questa tgira da mo 25 % ed adossescha a las vischnancas ils ulteriurs 75 %.
En vista a questas cuntradicziuns e malsegirezzas e per evitar malchapientschas concernent la tgira acuta e transitorica tschentain nus las suandantas dumondas a la regenza:
1. Quant concretamain definescha la regenza la noziun "tgira acuta e transitorica"?
2. N'è la regenza betg er da l'avis che questa tgira acuta e transitorica stuess vegnir indemnisada (independentamain dal lieu d'assistenza) sin la basa da la tgira a l'ospital e però en la relaziun 90 % chantun e 10 % vischnancas?
Cuira, ils 17 d'avrigl 2012
Noi-Togni, Bucher-Brini, Rosa, Augustin, Baselgia-Brunner, Blumenthal, Caluori, Casanova-Maron, Clalüna, Darms-Landolt, Della Vedova, Dermont, Engler, Fasani, Fontana, Frigg-Walt, Gartmann-Albin, Grass, Gunzinger, Hitz-Rusch, Holzinger-Loretz, Koch (Tumein), Kollegger (Malix), Lorez-Meuli, Mani-Heldstab, Märchy-Caduff, Marti, Meyer-Grass, Müller, Niederer, Niggli-Mathis (Grüsch), Papa, Pedrini, Peyer, Pfenninger, Pult, Righetti, Steck-Rauch, Thöny, Tomaschett-Berther (Trun), Trepp, Zweifel-Disch, Degonda, Deplazes, Hensel, Michel (Igis), Monigatti, Schucan, Stäbler, Spreiter
Resposta da la regenza
Cun la lescha federala dals 13 da zercladur 2008 davart la reordinaziun da la finanziaziun da la tgira è vegnida introducida la reordinaziun da la finanziaziun da la tgira per il 1. da schaner 2011. Quella attribuescha la finanziaziun da las prestaziuns da tgira en cas da malsogna, ch'è reglada en la lescha federala davart l'assicuranza da malsauns (LAMal), a duas categorias, numnadamain a prestaziuns da tgira duvradas a lunga vista (qua sutvart: prestaziuns da tgira) ed a prestaziuns da la tgira acuta e transitorica.
Las prestaziuns da la tgira acuta e transitorica ston sa mussar sco necessarias suenter ina dimora en l'ospital e vegnir ordinadas da la media u dal medi d'ospital (art. 25a al. 2 LAMal). La finamira è che las persunas assicuradas returnian a quel stadi, en il qual ellas sa chattavan avant l'entrada en l'ospital. Areguard il cuntegn na datti nagina differenza tranter las prestaziuns da tgira e las prestaziuns temporaras da la tgira acuta e transitorica. Tant per il sectur ambulant sco er per il sectur staziunar sa tracti dal catalog da prestaziuns ch'è circumscrit en l'art. 7 da l'ordinaziun davart las prestaziuns per la tgira da malsauns (OPM; CS 832.112.31).
Tenor l'art. 25a al. 2 LAMal ston las prestaziuns da la tgira acuta e transitorica vegnir indemnisadas da l'assicuranza obligatorica per la tgira da malsauns e dal chantun da domicil da la persuna assicurada durant maximalmain 2 emnas tenor las reglas da l'indemnisaziun da las prestaziuns d'ospital staziunaras. Per questas prestaziuns ston las assicuranzas ed ils furniturs da prestaziuns fixar pauschalas correspundentas. Perquai che la finanziaziun da las prestaziuns da la tgira acuta e transitorica vegn fatga tenor las reglas da la finanziaziun dals ospitals, na prevesa la LAMal nagina participaziun da las persunas che retiran prestaziuns. Tenor l'art. 7 OPM pon las prestaziuns da tgira sco er las prestaziuns da la tgira acuta e transitorica vegnir furnidas tras tgirunzas e tras tgirunzs, tras organisaziuns da la tgira da persunas malsaunas e da l'agid a chasa sco er tras chasas da tgira. Percunter na vegnan ils ospitals betg acceptads sco furniturs da prestaziuns en la tgira acuta e transitorica.
La regenza respunda las dumondas concretas sco suonda:
1. Per definir la tgira acuta e transitorica sin plaun chantunal n'exista nagin spazi d'agir. La noziun da la tgira acuta e transitorica è definida en la LAMal ed en ils relaschs consecutivs che sa basan sin tala sco er en ils materials legislativs correspundents.
2. Na. La regenza è da l'avis che la repartiziun da las contribuziuns dal maun public tranter il chantun e las vischnancas, fixada en l'art. 21 al. 2 da la lescha per promover la tgira da persunas malsaunas (75 % per las vischnancas e 25 % per il chantun), è correcta – en quai che concerna la tgira acuta e transitorica – per reparter las contribuziuns da las vischnancas e dals chantuns a las chasas da tgira, perquai ch'ella correspunda a la clav che vala er per la repartiziun da las contribuziuns da las vischnancas e dal chantun a las ulteriuras prestaziuns da tgira en la chasa da tgira.
21 da matg 2012