Analisas ch'èn vegnidas fatgas per incumbensa dal Kassensturz e che han mussà che 9 da 20 products da giaglinom da detaglists svizzers èn contaminads cun scherms resistents a l'antibiotica, han attratg las ultimas emnas l'attenziun en Svizra. Pertutgads sajan er trais products da charn da pulaster da la Svizra.
Cunzunt tar vadels giuvens ed en l'allevament da giaglinas vegni applitgà antibiotica en cas da malsognas. E gist en il cas da l'allevament da giaglinas na vegnan betg tractadas las singulas giaglinas, mabain vegnan ils medicaments dads senza differenziaziun a tut las giaglinas. Ma precis questa applicaziun universala da medicaments – ch'è per uschè dir ina part da l'allevament – promova che las bacterias cumenzan a furmar resistenzas. Privlusa n'è pia betg l'antibiotica sco tala, mabain sia applicaziun excessiva ed inadequata. Uschia n'èsi alura er betg surprendent che medis averteschan gia daditg dal fatg ch'il dumber da pazients, tar ils quals l'antibiotica n'ha pli nagin effect cunter infecziuns privlusas, crescha fermamain.
Sin fundament da las explicaziuns qua survart supplitgeschan las sutsegnadras ed ils sutsegnaders la regenza da respunder las suandantas dumondas:
1. Tge posiziun ha la regenza envers la problematica tematisada en la dumonda, numnadamain envers la resistenza d'umans a l'antibiotica?
2. Èn enconuschents cas da resistenza a l'antibiotica, eventualmain cas cun consequenzas gravantas, en il Grischun?
3. Tge mesiras ha la regenza prendì u vegn ella a prender per far frunt a la tendenza ordvart privlusa che las resistenzas a l'antibiotica creschan ad in crescher?
4. Vesa la regenza alternativas tar l'applicaziun d'antibiotica en l'allevament d'animals?
Cuira, ils 18 d'avrigl 2012
Niederer, Niggli (Grüsch), Gunzinger, Albertin, Berther (Mustér), Berther (Camischolas), Blumenthal, Bucher-Brini, Caduff, Casutt, Cavegn, Conrad, Darms-Landolt, Della Vedova, Dermont, Fasani, Felix, Frigg-Walt, Gartmann-Albin, Geisseler, Holzinger-Loretz, Jenny, Kappeler, Kollegger (Malix), Märchy-Caduff, Meyer-Grass, Michael (Castasegna), Müller, Nigg, Noi-Togni, Parolini, Parpan, Peyer, Pfenninger, Pult, Righetti, Rosa, Sax, Stiffler (Tavau Plaz), Thöny, Tomaschett (Breil), Tomaschett-Berther (Trun), Trepp, Troncana-Sauer, Vetsch (Claustra Vitg), Audétat, Buchli (Favugn), Degonda, Deplazes, Fausch, Liesch-Schön, Michel (Igis), Patt, Spreiter, Stäbler, Vincenz
Resposta da la regenza
Sco ch'i vegn explitgà correctamain en la dumonda, s'augmenta il dumber da scherms infectus resistents a l'antibiotica sin l'entir mund ed uschia er en il chantun Grischun. In dals motivs ils pli impurtants per questa tendenza è il diever universal d'antibiotica.
Resistenzas resultan principalmain, perquai ch'ils medicaments na vegnan betg applitgads adequatamain ni en la medischina umana ni en la medischina veterinara. Sche l'antibiotica vegn dada en dosas memia pitschnas, durant in temp memia curt u memia lung ubain senza indicaziun correcta, pon las bacterias daventar resistentas als medicaments cun mutar lur substanza ereditara. Tras la selecziun natirala vegnan promovids scherms resistents. En il fratemp exista ina retscha da scherms infectus che pon vegnir tractads mo pli cun antibiotica da la "ultima reserva" e ch'èn correspundentamain privlus.
Ils scherms resistents pon – ditg fitg simpel – vegnir dividids en duas gruppas: il "staphylococcus aureus multiresistent" (en la lingua clinica numnà MRSA) e la "extended-spectrum β-lactamase" (ESBL).
Scherms MRSA chattan ins principalmain en ospitals gronds cun staziuns da tgira intensiva u en instituziuns da la tgira da lunga durada. L'ultim temp èn ils scherms er vegnids constatads tar purs ch'èn uschiglio sauns. Quai mussa fermamain che la resistenza sa furma er en la tratga d'animals. En ils ospitals ed en las chasas da tgira vegnan ils scherms MRSA cumbattids principalmain e cun in success vaira grond tras ina igiena rigurusa.
La ESBL chattan ins en numerusas bacterias che vivan principalmain en la beglia. Questas bacterias transmettan ils gens en in process permanent ed absolutamain natiral d'in individi a l'auter, eventualmain ad in individi d'ina autra spezia. Il gen daventa uschia in "bain communabel" e na po – er tras la meglra igiena – betg pli vegnir cumbattì cun success.
En la medischina umana è il diever d'antibiotica reglà en moda fitg severa tant tras directivas medicinalas sco er sin plaun federal en la lescha davart ils products terapeutics (CS 812.21) ed en ses relaschs accessorics. En il sectur veterinar è la pratica percunter bler pli lucca. Uschia dastgan ils purs – sut tschertas cundiziuns ed en il cas singul – dar antibiotica en moda autonoma, senza clamar in veterinari. Tras questa regulaziun resulta savens in diever inadequat d'antibiotica en la tratga d'animals. En circuls medicinals spezialisads vegn il diever d'antibiotica en la tratga d'animals agricula considerà sco in dals motivs principals per il svilup da resistenzas a l'antibiotica. La cumpetenza regulativa legislativa per il diever d'antibiotica ha principalmain la confederaziun. Uschia resta l'efficacitad da las mesiras, ch'ils chantuns pon prender, en in rom stretg.
La regenza respunda las dumondas tschentadas sco suonda:
1. La regenza resenta quest svilup sco smanatschant.
2. Cas gravants cun scherms multiresistents chattan ins da temp en temp en ils ospitals grischuns. Fin oz n'èn dentant mortas naginas persunas, perquai ch'i na fiss betg stà a disposiziun in'antibiotica efficazia.
3. En l'art. 22a da l'ordinaziun tar la lescha per promover la tgira da persunas malsaunas (DG 506.060) ha la regenza obligà ils ospitals da sa participar a mesiraziuns da la qualitad d'organisaziuns naziunalas. En quest rom vegnan er registradas datas davart las quotas d'infecziuns ed uschia er davart la qualitad da l'igiena. Plinavant prevesa la regenza – en il rom da la planisaziun dals ospitals – d'obligar ils ospitals d'engaschar sezs u en cooperaziun cun in partenari in infecziolog.
En il sectur veterinar ston vegnir meglieradas las enconuschientschas dals veterinaris, dals purs e dals absolvents da la scola d'agricultura Plantahof davart ils andaments infecziologics e davart l'applicaziun d'antibiotica. Actualmain sustegna l'uffizi per la segirezza da victualias e per la sanadad d'animals in studi scientific davart l'existenza da chaschiel contaminà. En il rom da quest studi duai vegnir perscrutada l'existenza d'ina spezia da bacterias ch'è fitg suttaposta a la furmaziun da resistenzas.
4. L'alternativa al diever d'antibiotica è la midada da furmas da tratga d'animals intensivas a furmas extensivas e main engrevgiantas. Colliads cun quai èn ina indicaziun severa dals medicaments applitgads ed il diever dals medicaments sut la surveglianza d'in veterinari. Quai premetta dentant ch'il possessur d'animals saja conscient da la problematica e ch'el tschernia – en il senn da l'atgna responsabladad – furmas da producziun alternativas per sias tratgas d'animals ed acceptia ina reducziun dal retgav.
20 da zercladur 2012