Cun la part chantunala dal gudogn net da Swisslos che vegn attribuida mintga onn a la finanziaziun speziala "sport" vegnan sustegnids totalmain set secturs da promoziun: stabiliments da sport ed edifizis da sport, materials da sport ed urdains da sport, occurrenzas da sport, promoziun da sportistas e da sportists, delegaziuns ad occurrenzas da sport da la ARGE ALP, projects generals per promover il sport, contribuziuns pauschalas annualas a las federaziuns per lavurs generalas da federaziun e d'uniun.

Per la lavur generala da federaziun e d'uniun vegn pajà a las federaziuns dapi l'onn 2010 mintgamai var 1 milliun francs per onn. Dapi l'augment da las tariffas da contribuziun per material da sport l'onn 2008 profiteschan las organisaziuns da sport en il fratemp da passa 300'000 francs per onn per cumprar equipament, stangas da slalom, ballas e.u.v. In dumber legraivlamain grond da las occurrenzas da sport dal Grischun vegn ultra da quai sustegnì mintga onn cun contribuziuns da var 600'000 francs. Ensemen cun ils pajaments per frequentar scolas da sport extrachantunalas (contribuziuns da promoziun per singulas sportistas e singuls sportists talentads spezialmain) ed il sustegn finanzial a federaziuns per la participaziun ad occurrenzas da sport da la ARGE ALP èn – tar ina part dal gudogn da 2'880'500 francs (2011) – las expensas da passa 2 milliuns francs fitg constantas en quests secturs da promoziun.

Cuntrari a las contribuziuns menziunadas han ils dus secturs da promoziun "stabiliments da sport ed edifizis da sport" e "projects generals per promover il sport" ina volatilitad fitg gronda. Ils ultims otg onns variavan las contribuziuns – en dependenza dals projects inoltrads da las organisaziuns da sport – per quests dus secturs tranter 300'000 francs e 2,65 milliuns francs. Perquai è la regenza da l'avis ch'igl è necessari en il rom d'ina planisaziun precauta e prospectiva da tegnair reservas per pudair sustegnair projects da construcziun e da promoziun pli gronds er en il futur. Da questa tenuta prospectiva vegni tegni quint en l'art. 34 da l'ordinaziun davart las finanzas dal chantun Grischun (OFC, DG 710.110) dals 25 da settember 2012. Tenor quella dastgan las contribuziuns a quint da finanziaziuns spezialas, da las qualas la facultad è bilantschada en il chapital ester, vegnir garantidas mo en il rom da l'effectiv da la facultad.

Quai vuless dir areguard l'onn 2011 che l'effectiv dal fond na dastga betg crudar sut 2,27 milliuns francs en cas da contribuziuns empermessas da var 2,268 milliuns francs. Questa directiva vegn observada cun in effectiv avant maun da circa 8,88 milliuns francs (31 da december 2011).

Ina retschertga tar ils responsabels dal fond da sport fatga a chaschun da la dieta chantunala da Swisslos dals 11 da matg 2012 a Basilea ha mussà che la gronda part dals chantuns tegnan ina reserva da var duas quotas annualas per pudair gulivar variaziuns annualas ed a medem mument per restar abels d'agir tar projects pli gronds da l'infrastructura e dal svilup. Exempels d'auters chantuns, dals quals il fond da sport 2010 sa chattava en il minus cun in import da duas cifras mussan, ch'ina deliberaziun memia generusa da contribuziuns na sa chatta betg en l'interess a lunga vista da las uniuns e da las federaziuns.

Sut quest aspect respunda la regenza las dumondas tschentadas sco suonda:

1. L'effectiv dal conto è sa sviluppà ils ultims 10 onns sco suonda:



2. La regenza vul pudair sustegnair las uniuns e las federaziuns en il Grischun sche pussaivel er en l avegnir cun ils medems imports, sco ch ella ha fatg quai en il passà. Necessarias per quai èn ina planisaziun prospectiva ed ina deliberaziun economica dals daners dal fond da sport. La regenza vul sustegnair vinavant las structuras existentas dal sport grischun che funcziuneschan cun contribuziuns a la lavur da federaziun generala sco er a l acquist da material da sport e per occurrenzas da sport. Il medem mument vuless ella però er esser finanzialmain flexibla avunda per laschar crescher chaussas novas cun sustegnair edifizis pli gronds e projects per promover il sport pli pretensius. Ultra da quai vali d observar las directivas da la lescha da finanzas.

3. La regenza vegn ad attribuir ils meds finanzials dal fond da sport er en l avegnir a la promoziun dal sport. Sco che l effectiv dal conto mussa, variava la relaziun tranter contribuziuns empermessas e l autezza da la part dal gudogn fitg ferm dad onn ad onn. Adina puspè èn vegnids iniziads en il passà projects cun imports extraordinaris, uschia per exempel la gimnastica "mapi", ils GKB-SPORTKIDS u l installaziun da centers da prestaziun regiunals u schizunt naziunals. 2012 vegnan las contribuziuns empermessas probablamain a surpassar cleramain la part dal gudogn.

31 d'october 2012