La repartiziun da la part chantunala vi dal gudogn net da Swisslos sa basa sin l'art. 38 da la lescha davart las finanzas dal chantun Grischun (lescha da finanzas, LFC, DG 710.100) dals 19 d'october 2011. Da la part chantunala annuala vi dal gudogn net da la lottaria naziunala vegnan attribuids – tenor il conclus dal cussegl grond – 27 % al fond da sport. Uschia restan 73 % da la part annuala vi dal gudogn net per la promoziun da la cultura sco er per la protecziun da la natira e da la patria. Quests 73 % van a favur da la finanziaziun speziala da la lottaria naziunala. Els stattan a disposiziun per la promoziun da la cultura, per la protecziun da la natira e da la patria sco er per contribuziuns che pertutgan il champ da cumpetenza da la regenza. Suenter avair assegnà l'incumbensa Kunz concernent l'eliminaziun dal tractament inegual dal sport tar la repartiziun dals meds finanzials da la lottaria naziunala vegn suttamessa al cussegl grond en il rom da la missiva tar il preventiv 2013 ina revisiun parziala da l'art. 38 LFC durant la sessiun da december 2012.

Sin il champ da la promoziun da la cultura èn vegnids pajads a las artistas ed als artists ils ultims 10 onns tranter 5 962 137 francs (stadi 2002) e 9 168 018 francs (Stadi 2011) vi da projects (incl. premis e distincziuns). Dapi l'onn 2008 han pudì vegnir registrads dapli meds finanzials che van a favur da la finanziaziun speziala da la lottaria naziunala sco entradas da la part dal gudogn net da Swisslos. Sur il quint da la finanziaziun speziala da la lottaria naziunala (4271) vegnan pajads er ils meds finanzials per il sectur da la protecziun da la natira e da la patria sco er las contribuziuns che pertutgan il champ da cumpetenza da la regenza. En il sectur da la protecziun da la natira vegnan impundids massivamain dapli meds finanzials dapi l'onn 2010, pervia da la fasa iniziala dals novs parcs da la natira. L'onn 2010 han quests meds finanzials importà 1,0 milliun francs. L'onn 2011 è la summa dal fond sa reducida suenter la deducziun da las obligaziuns avertas. Tenor il preventiv vegn questa tendenza a durar en la medema dimensiun durant ils onns 2012 e 2013.

La regenza è da l'avis che – en il rom d'ina planisaziun precauta e prospectiva – i saja necessari da mantegnair ina tscherta reserva en il fond. Quella permetta da mitigiar e da gulivar divergenzas che pudessan resultar cun conceder garanzias per projects pli gronds u per ina quantitad pli gronda da projects.

Da questa tenuta prospectiva vegni tegnì quint en l'art. 34 da l'ordinaziun chantunala da finanzas (OFC, DG 710.110) dals 25 da settember 2012. Tenor quest artitgel dastgan las contribuziuns a quint da finanziaziuns spezialas, da las qualas la facultad è bilantschada en il chapital ester, vegnir garantidas mo en il rom da l'effectiv da la facultad.

Questa nova regulaziun signifitgess, sa referind a l'onn 2011, che, sche las garanzias da survegnir contribuziuns da circa 9,16 milliuns francs èn vegnidas dadas, l'effectiv dal fond na dastga betg esser pli pitschen che 9,2 milliuns francs. Questa prescripziun vegn observada cun in effectiv real che importa circa 14,2 milliuns francs (31-12-2011). La garanzia da survegnir contribuziuns da circa 9,16 milliuns francs è per 1,38 milliuns francs pli auta che la part annuala da la finanziaziun speziala da la lottaria naziunala vi dal gudogn net da Swisslos. Sche questa tendenza vegn a durar, vegnan las reservas ad esser consumadas entaifer 3 fin 4 onns e las contribuziuns stuessan vegnir reducidas.

Sut quest aspect respunda la regenza las dumondas tschentadas sco suonda:

1. Il conto da l'effectiv finanziaziun speziala da la lottaria naziunala è sa sviluppà durant ils ultims 10 onns sco suonda:



2. La regenza vul pudair sustegnair las artistas ed ils artists en il chantun Grischun er en l'avegnir sche pussaivel cun ils medems imports sco en il passà. Per quest intent èn necessaris ina planisaziun prospectiva ed in tractament spargnus dals meds finanzials da la lottaria naziunala. Ultra da quai hai num d'observar las prescripziuns da la lescha da finanzas.

3. La regenza vegn a laschar pervegnir er en l'avegnir ils meds finanzials correspundents dal fond da la lottaria naziunala a la promoziun da la cultura. L'onn 2012 vegnan las contribuziuns empermessas probablamain a surpassar la part dal gudogn.

31 d’october 2012