La psichiatria d'uffants e da giuvenils dal Grischun (PUG-GR) garantescha dapi onns il provediment psichiatric d'uffants e da giuvenils en l'entir chantun tenor ina incarica da prestaziun individuala da la regenza (prot. nr. 380).
Cun tractar la lescha davart l'organisaziun da la psichiatria durant la sessiun d'october 2012 èn vegnidas discutadas – areguard l'incumbensa e l'organisaziun da la PUG-GR – dumondas davart la cunfinaziun cun ils servetschs psichiatrics dal Grischun (SPGR).
Las deputadas ed ils deputads sutsegnads supplitgeschan da sclerir las suandantas dumondas davart la qualitad e l'effizienza da la PUG-GR:
1. Nua sa chatta la PUG-GR, sch'ins cumpareglia l'effizienza dals custs cun auters chantuns?
2. Co giuditgescha la regenza la qualitad da la PUG-GR?
3. Vesa la regenza avantatgs considerabels, sche la PUG-GR vegn messa sut ina structura da holding dals SPGR? Sa mussan quests avantatgs en meglieraziuns da la qualitad e dals custs?
4. Pon ins cumprovar che en chantuns, en ils quals la psichiatria d'uffants e da giuvenils è vegnida fusiunada cun la psichiatria da persunas creschidas, las furmas prevalan finanzialmain e qualitativamain autras furmas?
5. Resguarda la regenza ch'i saja necessari da diversifitgar tranter uffants e giuvenils per l'ina e tranter persunas creschidas per l'autra per tractar malsognas psichicas? Quai tant observond la distincziun locala, medicala, finanziala ed organisatorica sco er ord vista dal bain da las pazientas e dals pazients?
Cuira, ils 24 d'october 2012
Bucher-Brini, Niggli-Mathis (Grüsch), Marti, Albertin, Augustin, Baselgia-Brunner, Berther (Camischolas), Bleiker, Blumenthal, Brandenburger, Caduff, Casutt-Derungs, Della Vedova, Dermont, Dudli, Frigg-Walt, Gartmann-Albin, Hartmann (Champfèr), Hitz-Rusch, Jaag, Jeker, Jenny, Kleis-Kümin, Kollegger (Cuira), Kollegger (Malix), Krättli-Lori, Locher Benguerel, Meyer-Grass, Müller (Tavau Plaz), Niederer, Noi-Togni, Perl, Peyer, Pfenninger, Pult, Rosa, Stiffler (Tavau Plaz), Tenchio, Thöny, Trepp, Waidacher, Degonda, Hensel, Lauber, Monigatti, Müller (Susch), Patt (Tartar), Patt (Jenaz), Rischatsch-Casaulta, Schlatter
Resposta da la regenza
La regenza respunda las dumondas tschentadas sco suonda:
1. I n'è betg pussaivel da cumparegliar l'effizienza dals custs da la PUG-GR cun quella da servetschs en auters chantuns, perquai che per il provediment ambulant decentral en l'entir chantun èn necessarias tut autras structuras. Er ils custs dal sectur staziunar na sa laschan betg cumparegliar cun quels da servetschs d'auters chantuns, perquai che la purschida è differenta (nagins uffants, nagina dependenza).
2. La qualitad dals resultats da la PUG-GR vegn considerada sco buna. Questa decleraziun conferman er las partenarias ed ils partenaris che collavuran cun la PUG en in'enquista davart l'assegnaziun che la PUG-GR ha fatg per l'emprima giada l'onn 2012. In'enquista structurada da tut las gruppas d'interess fermas (pazientas e pazients, assegnadras ed assegnaders, collavuraturas e collavuraturs), sco ch'ella vegn fatga dals SPGR, n'exista dentant betg. Cun introducir instruments per garantir la qualitad standardisada, sco quels che vegnan per exempel applitgads dals SPGR, pudessan vegnir fatgas decleraziuns pli fundadas davart la qualitad. Decleraziuns davart singuls aspects da la qualitad dal tractament vegnan ad esser pussaivlas en l'avegnir suenter ch'igl è vegnì introducì en l'entira Svizra ina mesiraziun da la qualitad dal tractament psichiatric che correspunda a las mesiraziuns dad ANQ dal tractament staziunar en la somatica acuta.
3. Scleriments davart ils avantatgs sco er davart ils dischavantatgs d'ina fusiun dals SPGR e da la PUG-GR duai vegnir dada en la resposta da la regenza a l'incumbensa Casanova-Maron, inoltrada medemamain durant la sessiun d'october, concernent la fusiun dals servetschs psichiatrics dal Grischun (SPGR) e da la psichiatria d'uffants e da giuvenils dal Grischun (PUG), cun permetter in'examinaziun independenta, premess ch'il cussegl grond acceptia l'incumbensa.
4. Sco menziunà en las respostas a las dumondas 1 e 3 n'è ina tala cumprova strusch pussaivla.
5. La diversificaziun en il tractament d'uffants/giuvenils e da persunas creschidas è stringentamain necessaria ord vista da la medischina. Medemamain è inditgada la separaziun locala. Questa differenziaziun na vegn betg tangada d'ina collavuraziun pli stretga u d'ina fusiun da la PUG-GR e dals SPGR. Areguard las finanzas e l'organisaziun na vesa la regenza percunter nagins motivs stringents che pledan a favur da la necessitad da diversifitgar tranter uffants/giuvenils e persunas creschidas.
21 da december 2012